أحمد آدم: الجواز بيموت الحب.. «ومشكلتنا إننا ما بنفرقش بين الصداقة والجنس»
كتب: عزة عبد الحميد
كشف الفنان أحمد آدم عن رأيه في عدد من الأمور الحياتية خلال لقائه ببرنامج "حبر سري"، مع الإعلامية أسما إبراهيم عبر قناة القاهرة والناس.
وقال أحمد آدم خلال اللقاء، الذي أذيع مساء أمس، إن المساكنة بين الرجل والمرأة أمر حديث عُرف خلال تلك الفترة الزمنية ولم يكن معروفًا من قبل.
وأضاف: "مشكلتنا إننا مش بنعرف نفرق بين الصداقة والحب والجنس، ولما واحد بيعرف واحدة، بيبقى عايز التلاتة مع بعض، الواحد لو عرف الفرق بيعرف يختار اللي هيتجوزها، وأنا متحرمتش من الحكاية دي لأني كنت بمثل، وطول الوقت أصدقائي البنات أكتر من الصبيان".
وأشار آدم خلال تصريحاته حول السيدات: "الست لما بتحب حد بتعرف تجيبه"، متابعًا: "كنت في علاقة مع فنانة اشتغلت معاها مسرح، ومكنش من طرف واحد، الست لما بتحب راجل بتعرف تجيبه.. ومكنش فيه حكاية جواز هو كل حب لازم يحصل فيه جواز، الجواز بيموت الحب، الحب من غير أمل أسمى معاني الغرام، ولا هي طلبت جواز ولا أنا عرضت عليها جواز ولا كنا نعرف بعض عشان نتجوز، بنستريح للكلام مع بعضينا، كان حب مش من طرف واحد، ميتقاليش أنا كلام زي ده، أنا ممكن أحب واحدة وهي ولا تعرف، مينفعش أبان إن أنا بجري، ومعملتهاش ولا مرة من وأنا طفل".
