بعد الهجوم عليها.. لقاء الخميسي: «يا ريت نبطل نهين بعض»

علّقت الفنانة لقاء الخميسي على ما تعرضت له خلال الأيام الماضية من هجوم بسبب تصريحتها عن حياتها الشخصية.

وقالت لقاء الخميسي من خلال فيديو، قامت ببثه عبر حسابها بموقع تبادل الصور والفيديوهات، إنستجرام:" رجاء من كل الناس اللي بتتابع السوشيال ميديا.. اللي بيحب حد يدخل عنده ويقوله كلمتين حلوين أو يصمت.. مبتحبش متقولش ممكن نختلف في الأراء، لكن لازم نتعلم إزاي نحترم الاختلاف".

وأضافت:" ياريت نبطل نهين بعض، ونرفض أفكار بعض كل واحد زي ما تربى، وكل واحد وثقافته وكل شخص ليه تفاصيله ومعتقداته وأفكاره وثقافته، فلازم نحترم بعض على قد ما نقدر، ولا يصح أن أهاجم حضرتك.. الحاجة بقت تزهق بصراحة".

واستكملت الخميسي حوارها قائلة:" الممثل عنده نفس التفاصيل اللي بتمر بيها.. أزمات نفسية ومادية وعائلية ومشاكل ومنحبش نوريكوا مشاكلنا.. إحنا موجودين في الدنيا علشان خاطر نبسطكم ونفرحكم ونقدملكم محتوى يغير مودكم".

واختتمت حديثها قائلة:" إحنا بنيجي على نفسنا علشان نبسطكم، وبنحب شغلتنا وبنحبكم، فرجاءً حِبونا شوية وادونا هوا، وشوفونا بني آدمين طبيعين.. عندنا مشاكل وصدقوني مفيش حد في العالم معندوش مشاكل.. كل واحد ربنا بيديله على قد قدراته.. الرحمة حلوة ياجماعة".

وكانت تعرضت لقاء الخميسي لحالة من الهجوم عقب إعلانها عن موافقة زوجها على تواجد أصدقاء رجال في حياتها، وأن أصدقاءها الرجال أكثر بكثر من السيدات.