فنانة شابة تتهم لوسي بضربها: «شتمتني وجالي نوبة انهيار»
كتب: نسرين إبراهيم
اتهمت الفنانة الشابة ندا عفيفي، الفنانة الكبيرة لوسي، بالتعدي عليها بالضرب والسب داخل كواليس مسرحية "الحفيد" التي توقف عرضها بعد خلافات عديدة جمعت الأخيرة بفريق العمل.
وكتبت ندا عفيفي، عبر حسابها الرسمي على "فيسبوك"، وعلقت عليها قائلة: "هخرج عن صمتى واتكلم وأنا مرفوعة الرأس ومش هتكسف أقول اللى حصل معايا فى عرض الحفيد".
وقالت: "أولا بأكد كل معلومه اتكلموا فيها زمايلي من انتهاكات حصلت فى حقنا وكان سببها الفنانة لوسي بل بالعكس فى حاجات كتير وتفاصيل كتير متقالتش".
وأضافت: "عايزة أقول إحنا مكناش ساكتين ضعف أو تهاون فى حقوقنا ابدا بالعكس احنا كنا ساكتين احتراما للتحقيقات اللى كانت بتحصل والقائمين عليا وحب فى سمعه عرض الحفيد والمسرح القومى بالرغم من تصريحات الفنانه لوسي فى برنامج الأستاذة لميس الحديدى واللى كانت كلها افتراءات وتخلو تماما من اى شئ من الصحه".
وكشفت عن تعرضها للضرب والسب من الفنانة لوسي، قائلة : "الواقعه اللى تخصنى وهى أن الفنانه قامت بضربى وشتمى أمام الجمهور بالفعل مما اصابنى بالذهول وسابتنى على المسرح وخرجت، وما كان من الا انى احترمت المسرح القومى والجمهور الغالى وزمايلي وكملت شغلى لكن فور خروجى من على المسرح اصابتنى نوبه انهيار ومع ذلك كملت العرض زى اى فنان محترم وبيحترم شغله والخشبه اللى واقف عليها".
وتابعت: "دخلنا المشهد اللى بعده مسكتني وعنفتني تاني أمام الجمهور وانا فى المنتهى الذهول من العبث اللى بيحصل من فنانه كبيرة كان عندى امل أننا نتعلم من خبرتها الفنيه وان تحتضن هى مشاكلنا بدلا من افتعالها".
واستطردت: "خلصت ليله العرض وما كان من استاذ ايهاب فهمى مدير المسرح القومى كل التقدير لشخصه الا كل احتواء لنفسيتى وجبر خاطرى ووعدى بأنه قام باللازم مع الفنانة لوسي وان حقى هييجي وانا مازلت حتى الآن اشكره لدعمنا واحترامه لفننا.. وبعدها توقف العرض والى باقى الأحداث اللى انتوا تعرفوها".
واختتمت ندا عفيفي، قائلة: "ومن الجدير بالذكر أن المخرج يوسف المنصور وعدنى أن اللى حصل ده مش هيعدى وكان مساندني وقاللي أنه خلاص تم الاتفاق على أننا هنستبدل الفنانة لوسي بفنانة أخرى وأن ده الطبيعي مع تخطي فنان لحدوده بهذا الشكل وفعلا فضلنا منتظرين معاد اول بروفة مع الفنانة الأخرى إلا أننا فوجئنا جميعا بالشكوى اللي قدمتها الفنانة لوسي لمعالي وزيرة الثقافة دكتورة غادة الكيلاني رغم أننا كنا متخيلين أن الفنانة لوسي هتبقى سعيده بقرار استبعادها لأنها دايما كانت بتقول انها مش عاوزه تكمل معانا.. ولكن طبعا الشكوى اللي هي قدمتها وقفت العرض وحصل بعد كده اللي زمايلي نشروه".
