الرئيس السيسي: «أنا بتابع التواصل الاجتماعي وبشوف تجاوزات في الكلام»
كتب: بسمة فرج
وجه الرئيس عبدالفتاح السيسي، رسالة طمأنة للمصريين، حول استقرارالمخزون الاستراتيجي للسلع مدة 6 أشهر، رغم الأعباء المالية الكبيرة.
وأضاف الرئيس السيسي خلال افتتاح المرحلة الثانية من المدينة الغذائية قائلاً :"بتابع مواقع التواصل الاجتماعي وبشوف إن ساعات بيبقى فية حماس زيادة وتجاوزات في الكلام،، أنا مش بتكلم عن موضوعات محلية، أنا بتكلم عن موضوعات خاصة بعلاقاتنا مع أشقائنا وده أمر يا جماعة ننتبه له كويس، خلي بالكم ده بيعكس مدى فهمنا وتقديرنا للعلاقات مع الأشقاء".
وأشار الرئيس السيسي، قائلاً :"مش عاوزين نتكلم فى موضوع الأكل كتير فى التليفزيون.. ميصحش.. الحاجة موجودة واحنا شفافين جدا معاكم وصادقين جدا وبنقولكم كل حاجة.. موسم القمح والرز والبنجر والقصب ده معناه حتى لو انت شايف 4.5 شهور للقمح ده معناه أن الإنتاج القادم ده بيسلم ده ومحافظين على 6 شهور.. رغم ان ده بيكلفنا أعباء مالية.. ومعناه حجز فلوس لمدة 6 شهور.. يعني بشترى وأحطهم في المخازن.. ده اللى احنا بنعمله وتكلفة كبيرة جدا في ظل اللى بيحصل في العالم كله.. لكن لا باس مستمرين على موقفنا رغم الظروف الاقتصادية الصعبة اللى بتقابلنا".
الرئيس يتحدث عن احتياجات الدولة من زيت الطعام
قال الرئيس عبدالفتاح السيسي، إن مصر تستورد 2.5 مليون طن زيت طعام، وهذا الرقم يمثل نسبة 90 % من حجم احتياجات الدولة، مضيفا: "بنستورد 2.5 مليون طن زيت وده اكتر من 90 % من احتياجاتنا وشغالين في خطة لزراعة 52 ألف فدان فول صويا.. والعام القادم 500 ألف فدان فول صويا لزيادة حجم إنتاج الزيت من فول الصويا.. وعلشان الفلاح المصري يستفيد بدل ما بنشتريه من بره".
وأضاف الرئيس السيسي : "متنسوش أن البلد خلال 40 سنة زادت بنسبة كبيرة جدا.. وكمان الدولة مقدرتش تعمل خطط وتنفذها تجابه بها هذا النمو الكبير".
سياسية الدولة
أكد الرئيس عبد الفتاح السيسي، أن سياسة مصر تتسم بالاعتدال والتوازن والانظباط الشديد تجاه الجميع في الداخل والخارج ، مضيفا: "عاوز أقول بتابع مواقع التواصل وبشوف إنه ساعات حماس زيادة أو حتى أقول تجاوزات في الكلام مش بتكلم عن موضوعات محلية بتكلم عن موضوعات خاصة بعلاقتنا مع أشقائنا وده أمر ننتبه إليه كويس".
أضاف الرئيس السيسي قائلاً :"ارجو اننا نخلي بالنا بتعكس مدى فهمنا ومدى تقديرنا للعلاقات مع الأشقاء وبالتالى لما يبقا فيه موضوع يتم تداوله بدون أساس وملوش خلفية بنعقد ونتكلم أمور قد لا يكون لها أساس من الصحة طيب ليه؟.. هنمشى وراء بعض المواقع المغرضة اللى عاوزة تعمل فتنة بينا وبين الأشقاء أقل حاجة نعملها نسكت إن مكوناش نقول كلام طيب نسكت.. حتى وسائل إعلامنا اللى احنا مش نبتدخل فيها..احنا مش بنكتب الا دايما لصالح تحسين ودعم العلاقات مش العكس علاقتنا طيبة بالجميع وده منهج ماشين بيه مش النهاردة ومنذ توليت المسئولية ده مسار بننتهجه كدولة حتى فى الأزمات والخلافات الكبيرة".
وتابع الرئيس السيسي: "احنا دايما مفيش تصريحات سلبية ومنظبطة جدا وميصحش نسئ لأشقائنا ومننساش وقفة اشقاءنا معانا.. لو فيه ازمة انا أطول لساني وأقول كلام مش مظبوط ده كلام لا يليق ابدا ..فين لا تنسوا الفضل بينكم.. لما نعمل كده كمواقع تواصل وبعض المقالات اللى اشوفها مع أشقائنا في المملكة العربية السعودية أو أى دولة أخرى.. لا لا احنا حريصين وده توجه دولة وأرجو كمواطنين ننتبه إن احنا لا ننساق وراء مواقع تريد الفتنة بيننا وعلاقتنا طيبة بالجميع وحتي فى أصعب الظروف.. ومش عاوز أقول أسماء دول لأن الأمور كلها تجاوزناها وكنت عارف كده ولو كان فيه خلاف مع دولة شقيقة خلال السنين اللى فاتت، كنت عارف إننا هنتجاوزها، حتى الأزمة مع إثيوبيا في سد النهضة بتلاحظوا إننا مابنقولش كلمة واحدة تسيئ.
أكمل الرئيس :"مكوناش نقول حاجة جيدة منقولش ولو مش هنبنى منهدش أرجو ناخد بالنا قوى وارجو مواقع التواصل وساعات بلاقي بعض الزملاء في الإعلام لو فيه خط وتصريح هنقوله كدولة بشكل رسمي ولو مقولناش ده يبقا الأمور ماشية طيبة..طيب يبقا نبني ونسئ ولا نحسن ونخلي بالنا يعني".
