تفاصيل الحلقة الأولى من برنامج «رميم» للداعية مصطفى حسني

يحرص محبي الداعية مصطفى حسني على متابعة برامجه كل موسم رمضاني جديد لما يقدمه الداعية المصري بأسلوب سهل بسيط يلمس القلوب، لذلك يرغب كل محبيه في مشاهدة برنامجه رميم.

وجاءت الحلقة الأولى من البرنامج بعنوان "يحيي العظام وهي رميم"، و الذي يهدف إلى إعادة ترميم روح وشخصية الإنسان من الإنكسارات التي يمر بها في الحياة، والتي يتم عرضها على قناة ON، و عبر صفحة الداعية مصطفى حسني الرسمية عبر قناة يوتيوب.

وفي بداية الحلقة بدأ الداعية مصطفى حسني قائلاً: المخلوقات كلها شبه بعض لأن الخالق واحد والتفاحة دي فيها مني ومنك شكلها حلو من بعيد ويمكن يكون طعمها زي العسل، لكن التفاحة دي مهدوم منها حته، والحته اللي اتهدمت منها واتكسرت بيدخل منها للتفاحة كل الأذى، ولو جربت إنك تاكل منها هتندم ويمكن تكره صنف التفاح، كل واحد فينا عنده حته اتكسرت في حدث مر بيه في حياته واتهدم بسببه حته من شخصيته، الهدم ده سر معاناته ولو اتعامل مع حد بالكسره اللي فيه ممكن يدفعه ثمن مش ذنبه، السر إن انت تحاول تعرف اللي اتكسر فيك وتحاول تعالج رميمك عشان تكمل الحياة بسلام وكل اللي حواليك يعيشوا معاك في سلام.

رميمك يؤذيك أنت وغيرك

عقلك الباطن هو مخزن المعلومات اللي بتتكون من التجارب اللي بتعدي بيها وكل تجربة عقلك بيخزن معلومات مرتبطه بمشاعر ينتج منها كل سلوكياتك في تجاربك اللي جايه، في تجارب بتبنيك و تكبرك فبتكون النور والسلام ليك، و تجارب بتهدمك .

الأجزاء المهدومة اللي مريت بيها دي اسمها "رميم" وربنا سبحانه وتعالى قال في سورة يس "يحيي العظام وهي رميم"، الأجزاء المهدومة دي عاملة زي الجرح اللي هينزف عليك و على ناس ممكن يكون ملهمش ذنب.

لكن دلوقتي أنت المسئول عن إعادة ترميم ما هدم من شخصيتك، وفي أربع أشياء الإنسان معرض إنهم يتهدموا منه في رحلة حياتة 

1- نظرتك لنفسك.

2-عقيدتك في ربك.

3-جدوى تمسكك بمبادئك.

4-طريقة إدارتك للعلاقات.

والمدد ده هو الرميم اللي هنقف و نعيد بناء وترميم اللي اتهد مننا.

استعن بالله

الله قادر على ترميم أي جزء فيك، استعانتك لربنا في كل خطواتك السهل والصعب، زي ما ربنا سبحانه وتعالى خلقنا أسوياء وزرع فينا القدرات والمدد من عنده وكسرتنا الحياة وبعض الأشخاص والمواقف، الله قادر على إعادة بناء ما انهدم منا، عشان نعيش عيشه سوية ونقدم على الله يوم القيامة بقلب سليم.

واختتم الحلقة قائلاً: في النهاية كل شرخ شرخته الحياة والأشخاص والمواقف في الإنسان الله قادر على إعادة بناءه وترميمه، فهي رحلة هناخد فيها بالأسباب، ونتعلم بالعلوم الحديثه مع العلوم الشرعية الشريفة، لكن أهم ما في الرحلة يا رب الإستعانة بالمحيي على إحياء وإعادة و بناء ما انهدم منا بإذن الله.

والجدير بالذكر أن الداعية مصطفى حسني قدم شهر رمضان الماضي برنامج "القناع" وناقش البرنامج الفطرة الطبيعية الذي خلق الله الإنسان عليها، وأن الله خلقنا و وضع فينا من صفاته على قدر الإنسان، و إذا سيطر الخوف على أي شخص فسيحجب عنه شخصيته الربانية الصادقة.