«كسرة القلب بعد فقدان عزيز».. عنوان الحلقة الثانية من برنامج «رميم» لـ مصطفى حسني

جاءت الحلقة الثانية من برنامج "رميم" بعنوان "كسرة القلب بعد فقدان عزيز"، وناقش فيها الداعية "مصطفى حسني" ليه القلب بينكسر بعد فقد حبيب؟ وإزاي تتعافى وترمم الانكسار علشان تقدر تكمل الحياة ؟.

وفي بداية الحلقة بدأ الداعية مصطفى حسني قائلاً: "بيحكلنا سيدنا أنس ابن مالك خادم النبي عليه الصلاة والسلام عن وفاة سيدنا محمد، بيقول "فما أن دفنا رسول الله حتى أنكرنا قلوبنا" ويصعد سيدنا بلال بعد وفاة النبي يحاول يؤذن للصلاة القادمة، فيحتبس صوته ولا يستطيع أن ينطق أشهد أن محمد رسول الله من كثرة البكاء، ويروح سيدنا بلال ويطلب من خليفه رسول الله سيدنا أبو بكر إنه يسيبه يرحل إلى الشام ،فما يستطيع أن يعيش في المدينة يؤذن بعد وفاة النبي عليه الصلاة والسلام.

لما إنسان بيموت وكان ليه طلة كبيرة في حياتك الطبيعي إنك تتوجع ولكن كسرة القلب اللي بتمنع الإنسان إنه يكمل حياته فبيحتاج يرمم الكسرة دي عشان يعرف يكمل حياته.

من أسباب كسرة القلب اللي محتاج ترميم بعد وفاة عزيز :

1- عظم مكانة الشخص اللي اتوفي.

2- عظم تأثيره في حياتك وسنده ليك.

ولكن في الله عوض عن كل شئ.

من علامات إن القلب اتكسر كسره محتاجه علاج:

1- التوقف عن العبادة وطول فترة الحزن عن الطبيعي.

2- توقف وعطلة ممارسته لجوانب حياته.

3-طفي متعمد للمشاعر اسمه الصمت العاطفي.

4- سيطرة التشاؤم وكراهية ذكر الموت.

ربنا لم ينهى عن الحزن لكن ميحبش أنه يسيطر علينا، ربنا عايز تحافظ على حياتك وتستدعي بعض العقائد عشان تداوي هذا الرميم.

العقائد اللي تساعدك على بناء ما هدم فيك:

1- اللي مات مش لوحده ده بيقابل كل حبايبه اللي ماتوا وسبقوه لربنا.

2- انتقل للرفيق الأعلى.

3- متأكد بقدرتك على تحمل اللي حصل ده "الموت من الثوابت اللي الكل هيدوقه فأنت تقدر تستحمل ده".

4- خد وقتك في الحزن بس كمل جوانب حياتك واللي مات مبسوط.

واختتم الحلقة قائلاً: "أكبر خير بيجنيه الشخص اللي رمم كسرة قلبه بعد فقد عزيز هو اتزان نظرته للدنيا، من أكبر نعم ربنا على قلبك انك تعرف تعيش الفرحة من غير ما تعصي وتعرف تتحمل الحزن وتكمل حياتك؛ لأن هي دي طبيعة الدنيا يوم فرحة ويوم حزن.. كثرة العطاء والمنع بتخلي الإنسان متزن، يفرح من غير ما يعصي، وهو فرحان يدوق اللي حواليه من الفرحة، مش يبقى متكبر لأنه عارف إن الدنيا زايلة، فالفرحة متزنة، ويعرف إن مفيش حزن هيقطم وسطه، وإن ربنا معاه في وقت وجعه وحزنه، فيبقى ساكن".

ويهدف برنامج رميم إلى إعادة ترميم روح وشخصية الإنسان من الإنكسارات التي يمر بها في الحياة، والتي يتم عرضها على قناة ON.

والجدير بالذكر أن، الداعية مصطفى حسني قدم شهر رمضان الماضي برنامج "القناع" وناقش البرنامج الفطرة الطبيعية الذي خلق الله الإنسان عليها، وأن الله خلقنا و وضع فينا من صفاته على قدر الإنسان، وإذا سيطر الخوف على أي شخص فسيحجب عنه شخصيته الربانية الصادقة.