خالد يوسف: الانتقادات لـ«سره الباتع» تستهدفنّي شخصيًا

قال المخرج خالد يوسف أن الهجوم على مسلسل "سره الباتع" المعروض خلال رمضان 2023، يستهدفه بشكل شخصي.

وأشار خالد يوسف خلال لقاءه ببرنامج "ET  بالعربي"، قائلاً :"الانتقادات دي موقف ضدي أنا شخصيا مش ضد العمل، ومستعد وبتحدى يجي قدامي أي ناقد أو مؤرخ بيفهم في الفترة يقولي إيه مكانش معمول ومنضبط تاريخيًا .. ديكورات كما كانت، القلعة هي القلعة، القرية التاريخية هي القرية التاريخية، الملابس كما جاء وصفها في كتاب وصف مصر، والعمل أدق من أي فيلم اتعمل عن نابليون وفترة الحملة الفرنسية، فمحدش يستعبط ويقولي أصل أنا ملتزمتش".

وأضاف، يوسف، قائلاً :"اللي بيقول نابليون مكانش طويل كده، انت مالك، انت شفت الأفلام العالمية عن نابليون وشفت الكاستينغ بتاعها، أيمن الشيوي وبقولها في وسط كل من قدم نابليون في السينما العالمية هو الأكثر شبها بنابليون".

وهاجم خالد يوسف منتقدي مسلسله "سره الباتع"، قائلاً :"معنديش أخطاء معنديش غير لقطة واحدة ثانيتين بتاعة الكوتشي وصلحتها بعد العرض بنص ساعة، 99.99% من اللي اتقال غلط بالمنطق والعقل المصريين اللي استحدثوا أيام أحمس العربية الحربية اللي بيجرها الحصان بعد آلاف السنين مش هيعرفوا انهم يعملوا عربية بيجرها حصان ده كلام ده منطق، واللي يجي يتبلى على المسلسل ويقول العجلة فيها كاوتش والعجلة خشب 100%".

واستكمل دفاعه قائلًا :"الحملة اللي اتعملت ضد المسلسل في بداياته حملة ظالمة بامتياز بالنسبالي، اتكلموا عن حاجات مش موجودة في المسلسل، لما يبقى فيه الفين كومبارس قدامك وتعمل زوم إن على أخر صف وتبين تلاتة أربعة كومبارس شكلهم مصري، وتقول إن الكومبارس في المسلسل كلهم شكلهم مصري، باين جدا أن المسلسل كان مستهدف".

وعما أثير حول أن مسلسل "سره الباتع"، هو العمل الأخير دراميا الذي يقدمه المخرج، أجاب قائلاً :"لا معتزلتش ومش هعتزل أنا كل قصتي إني مش هعمل كده تاني واخد 6 شهور في عمل كبير زي ده تاريخي وعصري فيه كم المعارك اللي موجودة".