مصطفى كامل عن تحقيقات منير الوسيمي: «فيها بلاوي سودة»

كشف نقيب المهن الموسيقية مصطفى كامل، سبب تحول الموسيقار منير الوسيمي، للتحقيق.

وقال مصطفى كامل خلال كلمته بمؤتمر صحفي،" تجرى الانتخابات في معادها يوم 1 أغسطس، ويتم فتح باب الترشح يوم 11 يونيو، من أجل إعادة فرصة للترشح، في الأول كان بيضغط الوقت عشان الناس اللي ليها نصيب متلحقش، ولكن احنا أكبر نقابة فنية، فقولت حرام أدي مهلة أطول وندي فرصة للمرشحين يلفوا في المحافظات؛ لأن محافظاتنا كتير وفروعنا كتير".

وعن موقفه الشخصي من الموسيقار منير الوسيمي، قال: "هو نزل من أسبوعين دعم ليا، وكتبت منشور قولت فيه هذا الدعم لا يشرفني ويشرفني دعم زملائي كلهم المحترمين، وانهالت بعدها التعليقات عندي من زملاء بيقولوا إنه متمش محاسبته عن ما تم في الجهاز المركزي للمحاسبات من مخالفات صارخة وطالبوا بالتحقيق معه، ومكنش قدامي فرصة غير إني ألبي طلب الجمعية العمومية".

واستكمل: "فعلًا فتحت لهم التحقيق، وبعد منير الوسيمي طلع يسب ويقذف ومعرفش بيعمل كده ليه وبشوف إن ده نتاج طبيعي لأي شخص بيعمل حاجة غلط وميتمش محاسبته، مش عارف بيفكر إزاي، الشكوى المقدمة ضده مرفقة بمستندات بتقارير جهات سيادية زي الجهاز المركزي للمحاسبات 3 سنوات فيهم بلاوي سودة".