«مثلت عليا إن عندها جلطة».. هاجر الشرنوبي تكشف تفاصيل سرقتها على يد خادمتها

كشفت الفنانة هاجر الشرنوبي عن تفاصيل تعرضها للسرقة على يد خادمتها وعن حيرتها في التصرف بخصوص هذا الأمر.

كتبت هاجر منشورًا عبر حسابها الشخصى على "فيس بوك" جاء فيه: "أنا في اختبار صعب وعماله أسأل كل اللي حواليه أعمل إيه؟ الست اللي بتساعدني في البيت سرقتني، شكيت فيها اه بس مكنتش متأكده ومحبتش أظلم ولا أبلغ.. قولت أنا مش هجيبها البيت تاني وخلاص، كلمتني كذا مرة مردتش".

وأضافت: "المهم سابتلي ڤويس وصوتها كان تقيل صوت حد عنده جلطة.. أنا اتجننت إني ظلمتها ووصلت للحالة دي، كلمتها مالك يابنتي في إيه، قالتلي ابني كان مأجر موتوسيكل واتسرق منه والراجل شراني وعاوز فلوس عاوز كام كذا، المهم كلمت الناس اللي كانت بتساعدهم كلهم في البيت ولمينا فلوس أقسم بالله مش معايا أساسا وروحتلها البيت، بس حسيت أنها تمام وبكامل صحتها هي بس متقلة في صوتها مش أكتر".

وتابعت: "المهم قلت دي حاجة لربنا وخلاص وحسبي الله ونعم الوكيل فيها لو كل ده فيلم، وسافرت بعدها بعشر أيام، لقيت ظابط بيكلمني وبيقولي إن الست دي ظبطوها وهي بتبيع فرده الحلق بتاعتي ومع الضغط عليها اعترفت إنها سرقتني وإنها كانت بتمثل عليا إنها اتجلطت ما بين سين وجيم في التليفون، قلت للظابط بس أنا متنازلة ومش هينفع تتسجن عشان هي عندها أولاد صغيرين العفو عند المقدرة وبنتها الصغيرة كانت بتيجي معاها وأنا كنت متعلقة بيها عاطفيًا جدًا".

واستطردت: "هي زقردة كده عندها 9 سنين بس بحبها أوي كلمتني وقالتلي والنبي ياطنط أنا مش هعرف أعيش من غير ماما، ماما مسكوها وهي بتبيع الحلق بتاعك وفجأة الخط قطع، أنا مش عارفة البنت الصغيرة عارفة حقيقة والدتها ولا لأ؟ ودي بالنسبالي بجد قصة تانية أسوأ من كل الموضوع ده".

واستكملت: "المهم هرجع تاني للموضوع، اتضح إني لازم بنفسي أروح القسم اتنازل، ومن حظها الوحش إني كنت مسافرة واتأخرت عليها ولما رجعت من السفر روحت في اليوم الخامس اللي اتجددلها في الحبس، واتفاجأت وأنا في النيابة إن خلاص ميعاد جلستها بعد بكرة وللحظ السيء إني مسافرة برضه بس قررت أعمل توكيل لمحامي".

أردفت: "كلمت الناس اللي كانوا جيبينهالي والناس دي كلمت كل الناس اللي كانت بتروحلهم في الكومباوند اكتشفنا كمية سرقة ونقل كلام لا تعد ولا تحصي".

واختتمت هاجر الشرنوبي حديثها قائلة: "أنا ليه بحكي كل ده؟ علشان الحته اللي جايه دي بس، في حاجة كده رنت في ودني إني أكلم دار الإفتاء كلمتهم قالولي إني لو روحت وقولت إنها مسرقتنيش تبقي شهادة زور، ولو قولت إنها سرقتني بس أنا مسامحاها كده هيبقي تنازل عن شق مدني وهيبقي لسه في شق جنائي وهيتحكم عليها، إيه العمل؟ أتصرف إزاي أنا بجد صعبان عليا الأولاد الصغيرين أوي، وفي نفس الوقت أكيد مش هشهد زور اتصرف إزاي.. أنا عاوزه قرار يريح قلبي وضميري في نفس الوقت".

وجدير بالذكر أن، آخر أعمال هاجر الشرنوبي مسلسل مشوار "الونش" مع عدد من النجوم منهم محمد رجب، محمود عبدالمغني، ميمي جمال، منة فضالي، ميرهان حسين، إيهاب فهمي، وغيرهم، والعمل من إخراج إسماعيل فاروق وتأليف أحمد عبد الفتاح.