الجمهور يهاجم إبراهيم عيسى بسبب «فاتن أمل حربي»: كلام مندس ضد الدين
كتب: منى صموئيل
أحداث ساخنة وقضايا هامة يناقشها مسلسل فاتن أمل حربي، الذي يعرض ضمن السباق الرمضاني الحالي، ومن ضمن تلك القضايا التي تناولها المسلسل قضية حضانة الأطفال، حيث ذهبت "فاتن" في المسلسل إلى الأزهر لتسأل الشيخ على موقف السيدة المطلقة من حضانة أولادها إذا قررت الزواج مرة أخرى، وحينها حدثت مشادة كلامية بينها وشيخ الأزهر الذى يجسد دوره محمد الشرنوبي.
وفي ذلك السياق نشر الكاتب الصحفي ومؤلف العمل إبراهيم عيسى على صفحته الرسمية بموقع التواصل الاجتماعي فيسبوك، نص سيناريو المشهد والذي جاء كالآتي:
- لو سمحت يا شيخ كنت عايزة اسال سؤال
- اتفضلي حضرتك اسألي
- هل ربنا قال أن لو الست اتجوزت، تسقط حضانة عيالها؟
- أيوا قال
- يعني ربنا قال كدا بنفسه؟
= يعني إيه بنفسه؟!
- يعني هل فيه آية بتقول قال الله تعالى أن الست لما ..
= أنتي هتحرفي يا ست!
- ده مجرد سؤال، أنت باين عليك شيخ مستنير، ممكن تجاوبني يا شيخ، هل ربنا قال بنفسه أن الست لما تيجي تتجوز يبقى مالهاش ولاية على ولادها وتسقط حضانتها؟
= "لا ولاية لـ الأم على أموال أولادها القُصر" و ده مذهب الجمهور
- يعني ربنا ما قالش كدا، انتم اللي قولتوا
= احنا مين؟
- انتم الشيوخ، ما هو في كل اللي قولته، انت ما جبتش سيرة ربنا
= ايوا، ما هو ده الفقه
- انا بسأل عن كلام ربنا مش على الفقه
= يعني انتي هتفهمي كلام ربنا لوحدك؟
- على أساس أني ناقصة عقل طبعاً!
= لا طبعاً، شوفي يا ست أنا قولتلك الكلام اللي أعرفه، أو بمعنى أصح الكلام اللي حافظه أو اللي ينفع أقوله
- وأنا اتحداك أن ربنا ما قالش كدا!
= هو أنتي ذاكرتي دراستي عشان تتحديني!
- الحاجات دي مش محتاجه دراسة، ربنا عادل ورحيم، والرحيم مش هيحرم أم من عيالها.
وجاءت القضية الثانية التي فجرتها نفس الحلقة من المسلسل، مواجهة «فاتن» قانون قد يحرمها من حقوقها وابنتيها، بعد معاناة مستمرة مع طليقها، إذ حضرت نيللي كريم جلسة حكم مرفوعة ضد زوجها لنقله بناته من المدرسة إلى مدرسة أخرى حكومية وانفعلت فاتن على القاضي الذى جسد دوره الفنان خالد سرحان، ورددت ده قانون ظالم وانتهت الحلقة بأمر القاضي بحبسها 24 ساعة.
ونشر أيضًا الكاتب الصحفى إبراهيم عيسى نص المشهد على صفحته الرسمية بموقع التواصل الاجتماعي فيسبوك كالآتي:
- عايزة تقولي حاجة يا ست فاتن؟
= أه أنا عايزة أقول إنه هو طردني أنا والبنات من البيت ومش بيدفع مصاريف المدرسة وأنا ماعنديش فلوس عشان أدفع المصاريف وبالفعل رفعت دعوى ودلوقتي بنعمل تحريات عن دخله.
- قانونا كل قضية لوحدها يا ست فاتن.. النهاردة قضية الولاية التعليمية.
=طب أنا هاعمل بيها إيه إذا كان أنا مش عارفة أدفع مصاريف المدرسة.
- المصاريف دي قضية تانية خالص.
= أيوه ما هو حضرتك عشان أرفع الدعوى لازم أجيب وصولات بإن أنا دافعة مصاريف المدرسة وأنا ماعنديش فلوس حضرتك وهو طاردني في الشارع أنا وبناتي نعمل إيه، ما تتكلم يا أستاذ شكيب.
_ حاجة حاجة يا ست فاتن هو ده القانون.
= ما هي كل حاجه فيها حاجة.. ده قانون ظالم.
_ اسكتي يا فاتن اسكتي .. أعتذر يا سيادة القاضي نيابة عن موكلتي.
= أعتذر ايه مش عايزة أعتذر هو قانون ظالم يا شكيب.
_ اسكتي يا فاتن واعتذري لهيئة المحكمة.
= لا مش هاسكت القانون اللي مش بينصف الست ويخليها تربي عيالها في سلام يبقى قانون ظالم.
_ اسكتي يا ست فاتن واعتذري لهيئة المحكمة.
= لا مش هاعتذر أنا ماقولتش حاجة غلط أنتوا كل شوية عمالين تقولوا لي القانون القانون القانون هو القانون ده نازل من السما؟.
- ماتختبريش صبر المحكمة أكتر من كده!.
= أنا بقى عايزة أرفع قضية على قانون الأحوال الشخصية!.
- حبس 24 ساعة!.
= أنا ماعملتش حاجه أتحبس ليه.
وتصدر المسلسل تريند موقع التواصل الاجتماعي "تويتر" عقب تزايد الأحداث فى المسلسل الذي يناقش القضايا الخاصة بالمرأة المطلقة، ما بين مؤيد ومعارض لقوانين المرأة، وتفاعل العديد من مغردون تويتر مع المسلسل.
وقالت رشا الشامي، «ينقص إبراهيم عيسى أن يكون امرأة ليعبر أكثر عن جنون الواقع فبسهولة يمكنك أن تسمع زوجة تقول: أنا يومها ضربني لما قلتله كذا وتمر "ضربني" دون إيقاع مختلف، هكذا بكل بساطة تموت النساء مع كل تعنيف دون حتى أن يدركن ذلك أو يستغربن، مسلسل مهم، وننتظر حكاياتنا بأقلامنا نحن فاتن أمل حربي».
بينما قال آخر «فكرة إن إبراهيم عيسى يتحط اسمه على أي عمل (رواية - برنامج - جريدة - مقالة - سيناريو) دة كفيل يخليني أحط بلوك كبير على العمل ده، ومقربش ناحيته، مهما كان اللي بيناقشه».
قال آخر «كالعادة إبراهيم عيسى بيتكلم عن المسكوت عنه إزاي الأم تبقي حاضنة ويبقى ملهاش ولاية علي أطفالها وإلا تعرف تدخلهم مدرسة أو يسافروا معاها».
بينما قالت أخرى «كنت بتفرج على فاتن أمل حربى وبطلت اتفرج من انهارده لما لقيتها راحت للشيخ بتقولله الفقه ده مش كلام ربنا نفسه، هو ربنا قال كده؟، الفقه مش كلام ربنا إزاي يعنى؟ دخلت قريت شوية ما معنى الفقه (عشان مقولش أنى شخصية عارفة كل حاجة) ولقيت أن ده كلام مندس في وسط المسلسل ضد الدين».
وتدور أحداث المسلسل حول امرأة تجد نفسها في مواجهة قانون قد يحرمها من حقوقها وابنتيها، بعد معاناة مستمرة مع طليقها في الدراما التشويقية فاتن أمل حربي من كتابة إبراهيم عيسى لأول مرة في الدراما التليفزيونية، وإخراج محمد العدل، وترصد الأحداث قصة فاتن، التي تظن إثر طلاقها من سيف لاستحالة العشرة بينهما أن الحياة ستستقر وتخلو من المشكلات، لكنها تفاجأ بمواجهة قانون للأحوال الشخصية، قد يحرمها من ابنتيها إذا تزوجت من رجل آخر.
