تامر حبيب: أبويا كان معقدني بسبب تخني الزيادة

كشف السيناريست تامر حبيب، عن تفاصيل علاقته بوالده الراحل والتي شهدت توترا كبيرا خلال سنوات طويلة، مؤكدا أن والده تسبب له في عقدة نفسية بسبب هجومه المستمر عليه لزيادة وزنه.

وقال تامر حبيب، خلال لقائه ببرنامج على المسرح" الذي تقدمه الإعلامية منى عبد الوهاب المذاع على قناة الحياة: "دخلت كلية تجارة، واشتغلت محاسب، ووصلت لمرحلة الأمور كانت متلخبطة، وهنا الأمور وصلت لعلاقتي ما بيني وبين أبويا لحتة، بعد كده اكتشفت إنه عنده حق وده اللي مضايقني، طول عمري كنت تخين جدا، هو عايزني أخس علشان صحتي تبقى كويسة بلغني بيها كده، ما تقوليش منظرك هيبقى عامل زي الشوال لدرجة إنه جابلي عربية وركنها في الجراج وقالي مش هتركبها إلا لما تخس وعندت معاه وما خستش.. وأخدت العربية بعد كده".

وأضاف تامر حبيب: "أبويا كان عاملي عقدة بسبب التخن وهجومه عليا، فكنت بشتغل الشغل اللي محبهوش ومحروم من الحاجة اللي بحبها جدا، فجيت في يوم انفجرت وجتلي حالة هيسترية قطعت هدومي وقعدت أصرخ في البيت".

تامر حبيب يكشف كيف تغيرت حياته بعد خلافه مع والده

وتابع: "وجيت في يوم وأنا راكب العربية فتحت زجاج العربية، وكلمت ربنا يا تحببني في اللي بعمله يا تخليني أعمل اللي بحبه، في اليوم ده حياتي اتقلبت 180 درجة روحت على شغلي، كلمت واحد صاحبي قولتله اسأل أخر فترة للتقديم في معهد السينما امتى، والمطلوب إيه.. آخر أبلكيشن اتسحب كان بتاعي، آخر سن وأخر يوم للتقديم كان سني وكان يومي، وقبلت في المعهد واتصلحت مع الطفل اللي جوايا".

اقرأ أيضا: محمد رمضان عن أنغام: «أحلى ساعة لما اجتمعت مع صوت مصر في إعلان»