محمود حجازي يساند ريهام حجاج: «دايما بتتظلم من الناس وفيه حملات بتحاول تشوه صورتها بطرق غريبة»

انتقد الفنان محمود حجازي، حملة الهجوم المننهجة والمدفوعة من أطراف بعينها ضد النجمة ريهام حجاج وذلك بعد اتهام البعض لها بالتسبب في اعتزال الفنان توفيق عبد الحميد، وهو الأمر الذي نفاه الأخير.

وكتب "حجازي" عبر حسابه الشخصي على "فيس بوك" بقوله: "أنا في حاجة ماكنتش عايز اتكلم فيها بس بجد مش قادر أشوف حد علاقتي بيه طيبة وبشتغل معاه وبشوفه بيتعب قد ايه وبيتعامل مع كل الناس بشكل محترم جدا والاقيه دايما بيتظلم من الناس من غير ما تعرف تفاصيل دايما هو اللي بيشيل المشاكل كلها سواء كان جزء منها أو ميعرفش حاجة منها.. ليه بقينا بنستسهل الظلم".

وأضاف: "أنا السنة دي بشتغل 3 مسلسلات في رمضان وكانت سنة صعبة جدا وممتعة جدا وأنا محظوظ إني اشتغلت مع الأستاذ توفيق عبد الحميد اللي لسه شايف قرار إنه بعد الانتهاء من تصوير مسلسل يوتيرن سوف يعتزل الفن.. قد ايه الخبر ده زعلني جدا وبتمني أنه يتراجع فيه ويفضل يمتعنا بفنه الحقيقي المبهر وإن شاء الله هيحصل كدة".

وتابع: "كمان زعلت جدا لما شوفت الحملات والناس اللي عايزة تستغل الخبر ده لهدم وتشويه شخص هو بعيد كل البعد عن القرار ده بس لمجرد أنهم عايزين يهدموا أي نجاح بشكل مليان ظلم وعدم فهم واستنتاجات ليس لها علاقة بالحقيقة".

واختتم: "المشكلة أن دي طريقة بتتكرر وكل مرة بقول أكيد الناس هاتفهم لوحدها بس الاقي الموضوع مكمل بطرق غريبة والغريب أكتر أن في ناس بتستغل الموضوع ده.. وأنا مش بكتب الكلام ده ومستني أي حاجة غير إني حسيت لو أنا اللي وقع عليه الظلم ده وعايز الناس تفهم بس.. أنا ده تاني عمل ليا مع الاخت العزيزة ريهام حجاج.. والله أنا كلامي هتحاسب عليه قدام ربنا يعني ولا حد في الدنيا دي كلها هيأثر عليه غير الحق".

كان قد نفى الفنان القدير توفيق عبد الحميد ما تردد من شائعات بأن النجمة ريهام حجاج هي السبب في قرار اعتزاله الفن، مؤكدا أن حالته الصحية هي التي تستوجب ذلك.

وكتب "عبد الحميد" عبر حسابه الشخصي على "فيس بوك": "علاقتى بريهام حجاج طيبة جدا وهى فعلا بمثابة ابنتى والموضوع له علاقة بحالتى الصحية لأنها تستحق منى الاهتمام".

ومسلسل "يوتيرن" من بطولة ريهام حجاج، توفيق عبد الحميد، كريم قاسم، محمود حجازي، صفاء الطوخي، عبير صبري، أيمن القيسوني، محمود حافظ وغيرهم نخبة من النجوم. المسلسل من تأليف أيمن سلامة وإنتاج جمال العدل ومن إخراج سامح عبد العزيز.