أميرة سيد مكاوى تكتب: «المشوار فرصة عظيمة ضاعت بسبب السيناريو»

مسلسل المشوار حتى الآن

بالتأكيد لما يكون فيه عمل إخراج أستاذ محمد ياسين لازم الواحد يشوفه..

أستاذ محمد واحد من أهم صناع الجمال، ولما تعرف إنه لقاء بينه وبين محمد رمضان لازم الترقب يزيد، وتحاول تعرف هل سيستطيع محمد ياسين أنه يحول محمد رمضان لممثل خارج حدود منطقته الشهيرة؟ وهل رمضان نفسه ابتدى مرحلة جديدة بتغيير مسار أعماله؟ الاسئلة دي لازم تخليك تتفرج من باب الفضول على الأقل..

المسلسل بداية من فكرة التتر العبقرية لعبد الرحمن محمد بيقول إن فيه حاجة مهمة ومختلفة..

الصورة العظيمة اللي عاملها عبد السلام موسى في الحلقات الأولى واللي بتثبت أقدامه بعد فيلم أبو صدام وأفراح القبة بتقول إننا عندنا مدير تصوير صغير السن كبير الموهبة، الكادرات اللي في المساحات الواسعه وبياض الملح والإضاءة المدروسة في ممرات مخازن القطر بجد حاجة مشرفة، وبتقول إن مواهب شبابنا كبيرة وعظيمة..

موسيقى ليال وطفة شديدة العذوبة والجمال..

دينا الشربيني ومحمد رمضان دويتو متجانس جدّا، ودينا الشربيني في أفضل حالاتها رغم أنها مش من نجومي المفضلين، لكن مجهودها باين جدًا وده برضه راجع لإدارة أستاذ محمد ياسين، بتختلف لما بتكون مع مخرج بيخرج منها تمثيل مش شكل..

محمد رمضان تحت إدارة مخرج لا يسمح بالتدخلات مختلف ولمحة البلطجة اللي بيصر عليها غايبه، حتى نطقه للكلام متغير..

الممثلين اللي ظهروا إلى الآن في هذه الرحلة

- أستاذ أحمد كمال وأستاذ بيومي فؤاد.

- محمد علي رزق / ندا موسى/ سامي مغاوري/ أحمد صفوت/سما إبراهيم هم الأفضل وكلهم ماسكين شخصياتهم بشكل مظبوط.

لحد هنا ممكن تاخد سكرين شوت..

المسلسل ده فرصة عظيمة ضاعت بسبب النص المكتوب والسيناريو للأسف، مع كامل الاحترام لأستاذ محمد فريد، لكن رأيي الشخصي إنه ما يسمى بأعمال الرحلة تليق للسينما أكثر من الدراما، أو تحتاج إلى محطات كتير في المشوار ويبقى فيه حواديت لشخوص كل محطة بما إن عندنا مساحة تلاتين حلقة، وللأسف الشديد ده مش حاصل!

الخط في الكتابة إن الإبن مشترك معاهم في الكذب ومعرفة المسروقات كنت أفضل أنه دراميًا ميبقاش كدة..

الحلقات أصابها المط والتطويل احنا واصلين أننا بقينا بنشوف خمس مشاهد جديدة والمسلسل بيخلص!

محمد رمضان لما مبيفرضش سلطته وتدخلاته، ممثل جيد لكن مش جدًا وهو ده اللي أنا بقول عليه من زمان، وفي رأيي المتواضع كل من ذكرت أسمائهم في مشاهدهم معاه هم الأعلى أداء، وده مش وحش لكن نور كويس على حجم موهبته الحقيقي من غير تضخيم، لكن أن ربنا صارفله نجوميه دي حاجة تانية..

مسلسل توافرت له عناصر كتير أكثر من جيدة وظلمه النص..

ولو كان ١٥ حلقة كان تفادى مشاكل كتير..