منة القيعي عن خطيبها: ابن ناس ولذيذ.. وبداية تعارفنا كانت ارتباط على طول

تحدثت الشاعرة الغنائية منة عدلي القيعي عن خطوبتها على الفنان يوسف حشيش بعد يومين من احتفالهما بهذه المناسبة.

قالت منة عدلي القيعي: "شريك الحياة يفرح لنجاحك ويدعمك وينور لنجاحك، وطبيعي أن الشريك يبقى عنده مشكلة في التأخير، لو مش من باب الغيرة يبقى من باب القلق، بس هنا بقى الشخص اللي يعرف يتقبل ويفرق ويدعمك، وأنتِ كمان ماتسوءيش فيها أوي، معظم الناس اللي بشتغل معهم بيتحولوا لأصدقاء عيلة مش بس شخصي"، وذلك خلال حلولها ضيفة على برنامج "الستات" الذي يقدمه كل من مفيدة شيحة وسهير جودة عبر شاشة "النهار".

وتحدثت منة عدلي عن فيديوهات خطيبها يوسف حشيش التي كان يعارض فيها فكرة الارتباط، قائلة: "ارتبطنا في بداية رمضان الماضي، يوسف طيب أوي، وبداية تعارفنا على بعض كانت ارتباط على طول مكنش في أصحاب قبلها، تعارفنا كان لأننا في نفس الدواير، وبتفرج على المحتوى بتاعه، وعاملين لبعض متابعة، ومعجبين بشغل بعض، بس ما نعرفش بعض، بس كنت أسمع بقى أن البنات كلها بتحبه، وعرفت عنه من المعجبين، هو له ستايل لذيذ في الكلام وابن ناس جدا جدا، وبعدين ابتدينا نتكلم ومطولناش أوي في المعرفة".

وأضافت: هو كل يوم مع الوقت كان بيبهرني، والابهار مش بمعايير اليومين دول والحركات، بيبهرني بالحاجات الحقيقية اللي مكنتش بقابلها، زي تقبله للآخر وطيبته وبيسمع جدا ومش شخص ذكوري رغم أنه محتواه يبدو أنه ذكوري بس هو مش كدة، في رمضان كنا بنتقابل كتير لحد ما في يوم قال لي تعالي ننزل نتكلم وكنت مخمنة أن عنده فضول يعرفني أكتر.

واستكملت منة عدلي القيعي: يوسف بقاله كتير ما بيعملش محتوى المج الأخضر والناس فاكرة ان أنا السبب.

يشار إلى أن آخر أعمال يوسف حشيش مشاركته في مسلسل "الحشاشين" و"صلة رحم" في رمضان 2024.

مسلسل "الحشاشين" تأليف عبد الرحيم كمال، وإخراج بيتر ميمى، وإنتاج شركة سينرجى، وبطولة كريم عبد العزيز، فتحى عبد الوهاب، ميرنا نور الدين، أحمد عيد، إسلام جمال، نيقولا معوض، سامى الشيخ، ميمى جمال، عمر الشناوى، نور إيهاب، سوزان نجم الدين، نور محمود، أحمد كشك، ياسر علي ماهر، بالإضافة إلى عدد من الفنانين ضيوف الشرف.

أما مسلسل "صلة رحم" بطولة إياد نصار ويسرا اللوزي، أسماء أبو اليزيد، ومحمد جمعة، وعابد عناني، ونبيل نور الدين، وهبة عبد الغني، وعمرو القاضي، وداليا خليف، وريام كفارنا، وسلوى محمد على، ومحمد دسوقي، وصفاء جلال، وبتول حداد، ومحمد السويسي، تأليف محمد هشام عبية، وإخراج تامر نادي، وإنتاج صادق الصباح.