بعد الهجوم عليها.. آية سماحة تحذف المنشور الخاص بـ«ضحية الأسد» في الفيوم
كتب: أمنية مدحت
اضطرت الفنانة آية سماحة، أن تحذ المنشور الذي علقت عليه بشأن الحارس ضحية هجوم الأسد بحديقة حيوان الفيوم، وذلك بعد تعرضها لانتقادات حادة من الجمهور، لتبريرها قتل الأسد للحارس.
آية سماحة تحذف منشور وتوضح موقفها
ونشرت آخر، جاء فيه: "أنا شيلت البوست بتاع الأسد والحارس.. علشان لو في واحد في المية احتمال أن ممكن يكون الكلام مش حقيقي أو الصورة غلط أو الموقف محكي بشكل غلط.. (لو حصل ربنا ينتقم منه ومن اللي زيه.. لو محصلش ربنا يسامحه ويغفرله ويغفر لنا جميعا".
وتابعت: "ولكن علي العموم.. أنا هفضل طول عمري ضد أي حد يأذي أي حيوان.. أو حتى مقتنع أن أذية الحيوان مش حاجة كبيرة وتستاهل الإعدام.. وعند ربنا أكيد العذاب أكبر، أو الناس اللي بتقول الإنسان أولى من الحيوان والكلام الغريب ده، ربنا أكرم الإنسان وفضله عن باقي خلقه علشان يحميهم ويهتم بيهم.. مش يعتبرهم مخلوقات بلا روح أو مشاعر".
واختتمت: "حسبي الله ونعم الوكيل في كل من كان سبب في أذى إنسان أو حيوان لا حول له أو قوة، ويجعلني سبب إني أقدر أساعد كل ضعيف أو محتاج.. إنسان أو حيوان".
آية سماحة تشارك منشورا يبرر الهجوم على ضحية الأسد في الفيوم
كانت "سماحة" قد شاركت منشورا لأحد الأشخاص عبر موقع التواصل الاجتماعي "فيسبوك"، يوضح فيه أن الحارس الراحل كان يُخدر الشبل مقابل 100 جنيه، وما حدث للحارس من هجوم الأسد كان انتقاما منه.
علقت "سماحة" على المنشور، كاتبة: "ده أحسن حاجة أنه اتأكل.. يا رب عقبال كل اللي زيه، ربنا ينتقم منك". لتعود وتعدل البوست وتكتفي بجملة: "يا رب عقبال كل اللي زيه، ربنا ينتقم منكم".
ولاقت آية سماحة هجوما عنيفا من المتابعين، لكنها كانت مصرة على رأيها وردت عليهم بحدة شديدة.
