"الفلوس بتعمل مشاكل جامدة والناس اتغيرت".. تصريح جديد من فيفي عبده عن أزمة بوسي شلبي

علقت النجمة فيفي عبده، في تصريح جديد لها عن أزمة بوسي شلبي، بعد إعلان ورثة محمود عبد العزيز، في بيان، أنه الراحل طلقها منذ عام 1998، وأنها لست أرملته.

وقالت فيفي عبده في تصريح ضمن لقائها ببرنامج "كلام الناس" مع المذيعة ياسمين عز، المذاع على قناة MBC  مصر: "ما ذكرته في فيديو لي كلمة حق، وهو في دار الحق واحنا في دار الباطل، كنت دايما قريبة منهم، وكنا بنروح عمرة وحج أيام ما كان في محرم كان زوجها بيروح معاها، وفي حاجات كتير في مراحل كتير في حياتنا، واستغربت بالموضوع ونزل علينا زي الصعقة، وليه دلوقتي ليه مش بعد وفاته ولا هو عايش، إيه السبب مش عارفة".

وأضافت: "فوجئنا بحكاية الطلاق، وخلانا كل واحد عنده كلمة حق ونقول شهادة ربنا، جاى بعد 9 سنين تقولي إنه مطلقها، بوسي لغاية دلوقتي بتزور قبر محمود عبد العزيز، وعيب اللي بيحصل بعد خدمتها للراجل، دي مراته قدام الدنيا وإشهار والجواز إشهار.

وتابعت: "ده شئ يسئ للراحل، هي كانت مراته قدام الناس كلها، وكانت واقفة تاخد عزاء جوزها في الفيلا بتاعته وأولاده في عزا الرجال".

واختتمت قائلة: "الفلوس بتعمل مشاكل جامدة، ولازم الواحد يصرف الفلوس كلها وما يسبش قرش، للأسف كل الناس اتغيرت في الزمن ده، وبشوف حاجات غريبة ده قبل ما يدفنوا الميت بيدورا على الورث ودول الناس اللي مش محترمة، أما الناس المحترمة بتفكر تكرم الميت وتعمل خير له بفلوسه".