فيفي عبده: مش عايزة أموت وعايزة أشوف الدنيا.. ومش بحب حد يكلمني في مشاكل

أكدت النجمة فيفي عبده، أنها لا تحب ذكرى مناسبة عيد ميلادها، مؤكدة أنها لا زالت تريد أن تعيش وأن يمن الله عليها بالعمر، وذلك لقائها ببرنامج "كلام الناس" مع المذيعة ياسمين عز، المذاع على قناة MBC  مصر

وقالت فيفي عبده: "مش بحب عيد ميلادي، لأن بحس إن السنين عمالة تجري بسرعة، عمرنا بيجري مش فاهمة إيه السبب وبتمنى ربنا يطول عمري شوية، مش عايزة أموت، وعايزة أشوف الدنيا، ولا عايزة اتكلم في مشاكل ولا عن السياسة مش بفهم فيها".

وأضافت: "بقول لنفسي لازم انبسط، ومش حابة اتكلم في المشاكل عايزة طاقة إيجابية وكلام حلو عن الحياة وحاجة تفرح الواحد، لما كنت بتابع أخبار فلسطين سنة كاملة نفسيتي ادمرت وروحت لدكتور نفساني، مقدرتش إني ماتبعش، ومش فاهمة ليه الدنيا بقت كده".

وتابعت: "أنا قطعت علاقتي بصديقة قريبة مني سنة كاملة، مكنتش بكلمها نهائي، لأنها كانت طول الوقت تكلمني في مشاكل الشغالين والسواقين، ودي الأمور اللي بتكلم فيها الستات، الطباخ مجاش وهضطر اقوم اطبخ، والسواق عمل كذا.. طول الوقت بتكلم في حاجات مش عارفة أنا ليه بتكلم فيها، وهي صديقة لبنانية وبحبها جدا وصداقتها جميلة ونادرة، بس دلوقتي بنتكلم بس فهمت إني مش حابة اتكلم في مشاكل".

واستكملت: "ليه بنتكلم في مشاكل وليه بنطلع إشاعات مرض ووفاة، الفنان الجميل عادل إمام ربنا يديله الصحة والعمر والهنا، من كتر ما كان بيطلع عليه إشاعات وفاة كان بيقول خلوني اقرا عن العزا بتاعي بنفسي".