عمرو أديب ينتقد قرار مباراة القمة: «إيه هو العذر اللي بيجي للأهلي؟!»
كتب: أمنية مدحت
علق الإعلامي عمرو أديب على قرار لجنة التظلمات باتحاد الكرة، باعتماد نتيجة مباراة القمة، باعتبار نادي الزمالك فائزًا بنتيجة 3-0 فقط، وعدم خصم 3 نقاط من الأهلي.
عمرو أديب يعلق على قرار لجنة التظلمات باتحاد الكرة
وقال عمرو أديب في تعليق عبر برنامج «الحكاية» بقناة «إم بي سي مصر»، مساء الجمعة: «لجنة التظلمات قعدت شهور وأسابيع وفي الآخر قالت إنها ملهاش دعوة، وفي الآخر يقولك قرارات الرابطة نهائية، طيب مقولتش ليه من الأول».
وأوضح: «يقولك الأهلي عنده عذر قهري.. إيه هو العذر اللي بيجي للأهلي؟! كان في زلزال أو سيول أو بركان ولا ديناصور ولا إيه؟»
وأضاف: «لا أنصح بالذهاب إلى الفيفا والمحكمة الرياضية الدولية، هناك برضه هينصفوا الأهلي، لو رحت أمريكا هينصفوا الأهلي، لو عملت إيه هينصفوا الأهلي، لأن النادي الأهلي جبار».
وتابع: «لو مفيش منافسة ومفيش عدل نقعد فيها ليه، بنتفرج على إيه، مسابقة الدوري المصري بعد كده محدش هيتفرج عليها، إحنا الدوري الأخير عشان مفيش منافسة ومفيش عدالة… الزمالك وبيراميدز تعبانين ورفضوا أي هدية من الأهلي، بيراميدز تعبان، والزمالك مكفي على وشه».
وأكمل: «الأهلاوية نفسهم قالوا الكابتن الخطيب غلطان في الانسحاب… بعدين هوب هوب كله اتضرب في الخلاط اتعمل عصير سوبر أهلي، مشروب كده تاخده وتاخد الدوري على طول».
وختم أديب: «الأهلي هيلاعب البنك الأهلي النهارده السبت... يارب أنا عايز العدل، العدل يارب، وأنا يا ما دعيت قبل كده يا رب».
