إجلال زكي: جوزي التالت أخد كل فلوسي بعد جواز 15 سنة وساب بنته من غير أكل

كشفت الفنانة إجلال زكي، عن تفاصيل حياتها الخاصة، وأسرار زيجاتها الثلاثة وخاصة الثالثة التي استمرت لمدة 15 عاما، وانتهت بصدمة كبيرة لها.

وقالت إجلال زكي خلال لقائها في برنامج "الستات" مع مفيدة شيحة وسهير جودة: "خيبتي إني بحب بقلبي وكل مرة أقع، أنا تجوزت المخرج اللبناني يوسف شرف الدين وقعدت معاه 15 سنة، هو في سن الخمسين ابتدى يحب البنات الصغيرة وسافر على لبنان ولقيت حسابي في البنك كله على الصفر لأن كان ليه حق الإمضاء، فجأة لقيت نفسي على الزيرو".

وأضافت إجلال زكي: "هو كان الزوج التالت، الزوج الأول كان أبو الفتوح وهو أبو أولادي، والزوج الثاني كان الفنان محمد خيري ومقعدتش معاه إلا سنتين، وزوجي الثالث بعد ما أخد فلوسي مقدرتش أكلمه وأقوله حاجة مش بعرف، دي أول مرة أحكي الكلام دا".

وتابعت إجلال زكي: "أنا رصيدي والدعم بتاعي أمي وأبويا، كل ما أجي أقع ألاقيهم موجودين، أنا كان عندي شركة إنتاج وهو نسف كل دا، هو ابن ناس وحلو الكلام وأنا للأسف برج أسد وبيحب يسمع الكلام الحلو وبيضحك عليه أوي".

وأكملت إجلال زكي: "في علاقة قوية بيني وبين بنت زوجي الثالث هي ملهاش ذنب، كلمتني مرة وقالتلي أنا في لبنان ومش لاقية أكل، إحساسي هيكون إيه أنا تلاجتي مليانة والخير موجود قلت لها تعالي أهلا وسهلا بيكي بيتي مفتوح، وبيتي اتفتح لها ورحبت بيها، قعدت معايا 9 شهور".