الخطيب: ميزانية الأهلي وصلت 8.5 مليار جنيه.. ومفيش علينا أي ديون

في أجواء انتخابية داخل مقر النادي الأهلي بالشيخ زايد، ووسط حضور كبير من أعضاء الجمعية العمومية وعدد من رموز النادي، تقدمهم سيد عبد الحفيظ ورجل الأعمال ياسين منصور، تحدث محمود الخطيب، رئيس النادي، عن أبرز إنجازات مجلسه خلال السنوات الماضية وخططه للمرحلة المقبلة.

وقال الخطيب في كلمته: "ميزانية النادي الأهلي بتكبر، من 8 سنين كانت 800 مليون جنيه، قدرنا نزود موارد النادي ووصلناها السنادي لـ 8 مليار ونصف، ومش علينا أي فلوس من أراضي النادي الأهلي".

وأضاف: "النادي الأهلي مش بتاع حد، ومش ممكن يكون بتاع حد، الأهلي بتاع كل الأهلاوية، بتاع جمهوره وأعضاؤه وكل إنسان مخلص للكيان ده، كل فرد ينتمي للنادي له حقوق، لكن كمان عليه واجبات، وده سر من أسرار نجاح الأهلي".

وأشار الخطيب إلى أنه خلال السنوات الثماني الماضية كان يعمل يوميًا داخل النادي لفترات طويلة قائلاً: "كنت بقعد أقل حاجة 9 ساعات يوميًا في النادي، لكن دلوقتي لازم أهتم بصحتي، وهيتم توزيع الملفات على الزملاء في مجلس الإدارة".

واختتم رئيس الأهلي تصريحاته قائلاً: "الأهلي تاريخ ومبادئ وتطوير.. تاريخ عظيم ومبادئ راسخة، الأهلي مش مجرد نادي كورة، لكنه مؤسسة لها دور في المجتمع، ومش بتاع شخص، الأهلي بتاع الأهلاوية وجمهوره وأعضاؤه، وبتاع كل إنسان مخلص للكيان".