إلهام شاهين من مهرجان الجونة: "حياة الفنان مش كلها فرح.. ورا الكاميرا في وجع كبير"

خلال مشاركتها في ندوة تكريم الفنانة يسرا ضمن فعاليات مهرجان الجونة السينمائي، تحدثت الفنانة إلهام شاهين عن الجانب الإنساني والغامض في حياة الفنانين، مؤكدة أن ما يظهر للجمهور من لحظات الفرح والنجاح لا يعكس الحقيقة الكاملة.

وقالت إلهام:
"الناس بتشوفنا متصورين في حفلة وبنغني وبنرقص ولابسين حلو، لكن حياتنا مش كلها كده. محدش بيتصور المتاعب اللي بنعيشها. الناس مش بتشوف الفنان لما يكون مريض ولازم ينزل يصور عشان المسلسل بيتعرض على الهوا".

وأضافت:
"في ظروف صعبة جدًا بنمر بيها، ممكن الفنان يكون حزين أو فقد حد غالي، ورغم كده لازم ينزل يشتغل ويبتسم علشان يقدّم شغله".

وخلال تصريحاتها على هامش المهرجان، تطرّقت إلهام شاهين أيضًا إلى مشاريعها الدرامية المقبلة، وكشفت أن هناك عملاً كان يتم التحضير له لرمضان 2026، لكنه توقف بسبب بعض العراقيل، قائلة:
"كان فيه مسلسل بيتكتب، لكن تأخرنا شوية.. بين (مزاهر) و(كودية) لسه مش واضح هنلحق رمضان ولا لأ، لكن ممكن أظهر لو اتظبطت الأمور".