بعد تكريمها في THE BEST.. رحمة محسن:الأعمال الطيبة اللي عملتها بتحاوطني

شاركت الفنانة رحمة محسن جمهورها رسالة مؤثرة عبر صفحتها الرسمية على إنستجرام، قائلة:"في مشاعر كتير جوايا مش قادرة أعبر عنها، لكن مهم أتكلم عن شوية دروس اتعلمتها. الإنسان لازم يتقبل إن نجاحه ممكن يأكل قلب ناس مريضة، وإن في أشخاص ممكن ما يناموش الليل لو حسوا إنك بخير وكرم من ربنا، وفي ناس ممكن تبقى معاك بس عشان عندك مصلحة. ولما تخلص المصلحة دي، مش هايسيبوك تعيش، لازم يبذلوا أقصى مجهود ممكن عشان يدمروا حد تاني."

وأضافت: "لكن الأعمال الطيبة اللي عملتها بتحاوطني. مرة ما شاركتش في النميمة على حد، ومرة ما ظلمتش حد، ومرة سامحت حد، ومرة راضيت محتاج، ومرة جبرت بخاطر مكسور، ومرة ما قطعتش رزق حد، ومرة هونت وطبطبت على حد، ومرة سندت صاحبك، ومرة راضيّت أهلي، ومرة أكرمت أخويا… كل حاجة حلوة مهما كانت بسيطة بتحاوطني لما يجتمع بني آدمين على ظلمي."

وتابعت: "يمكن اللي حققته يكون بسيط في نظر ناس كتير، لكنه بالنسبة لي كبير جدًا، لإن أنا لوحدي عارفة قد إيه المشوار كان صعب ومليان تعب وشقاء. وبتمنى أي حد قابل ناس مؤذية وشريرة في حياته ياخد من تجربتي عبرة، لإن أخطر حاجة ممكن يتعرضلها أي بني آدم هي إنه يآمن ناس خاينة ويكرم إنسان لئيم."

وختمت رحمة حديثها قائلة: "ممتنة جدًا لله إنه دايمًا يطبطب على قلبي مهما زادت الشدة وكبرت المحنة، وأتمنى إن اللي جاي في حياتي يكون أطيب وأحن من اللي فات، الحمد لله الحمد لله الحمد لله."

وفي سياق آخر، تحدثت رحمة عن دخولها عالم التمثيل قائلة: "أخوض أولى تجاربي في التمثيل من خلال مسلسل علي كلاي مع النجم أحمد العوضي، والمقرر عرضه في موسم دراما رمضان 2026. أحمد هو اللي شجعني أدخل التمثيل بعد نجاحي كمطربة، وفي المسلسل هقدّم أغنيتين جديدتين بصوتي، والدور مختلف عن كل اللي قدمته قبل كده، لأنه بيجمع بين الشهرة والحب والخوف من الفضيحة."