أسما شريف منير تثير الجدل برسالة جديدة: اتخذلت من أقرب الناس.. وشكيت في إيماني

أثارت الفنانة أسما شريف منير تفاعلًا واسعًا وقلق متابعيها، بعدما شاركت رسالة مؤثرة عبر حسابها الشخصي على موقع التواصل الاجتماعي إنستجرام، كشفت خلالها عن فترة صعبة مرت بها مؤخرًا، وما صاحبها من صراعات نفسية وإيمانية.

ونشرت أسما شريف منير صورًا جديدة، وعلّقت قائلة: "الفترة اللي فاتت كانت صعبة، كان فيها كرب، ورزق واقف، وشكوك بتتسلل لعقلي، الشيطان حاول يقنعني إن التزامي هو سبب المشاكل، حسّيت بضغط من كل ناحية، وحتى من أقرب الناس ليا اتخذلت، بدأت أشك في إيماني، لكن لما رجعت لربنا فهمت إن الابتلاء جزء من طريق المؤمن، وإن الأنبياء نفسهم اتعرضوا لاختبارات، وده كان دليل على قربهم من ربنا".

وأضافت: "ربنا صفّى لي رؤيتي بشكل أنا نفسي ما كنتش متخيلة إني محتاجاه. بقيت أشوف الناس على حقيقتها، مش على اللي كنت بتمنى يبقوا عليه، ولا على الكلام الحلو اللي بيتقال، ولا على النسخة اللي كنت ببررها في دماغي علشان ما أخسرش حد.. بدأت أفهم مين بيحبني بصدق، ومين كان موجود بس علشان أنا «مفيدة»، ومين بيظهر وقت الجد حتى لو ده هيكلفه، ومين بيختفي أول ما الموضوع يحتاج مجهود، أو التزام، أو حتى مجرد احترام".

وتابعت: "عرفت إن اللي بيبان إن الدنيا ماشية معاهم كويس مش دايمًا بيكونوا على حق، وبدأت أشوف علامات إن الناس اللي حواليّ بيدعولي، وإن ربنا بيطبطب عليّ".

واختتمت رسالتها قائلة: "مع العسر يسر، حتى لو الوجع لسه موجود، أنا دلوقتي فاهمة إننا أحيانًا بننسى إن الدنيا مش الهدف الحقيقي، الهدف هو الآخرة، وإنها اختبار لصبرنا. اللي عايزة أقوله: لو بتمرّوا بوقت صعب، اعرفوا إن ربنا لسه عايزكم، ولو الدنيا وردي طول الوقت اقلقوا.. المهم رجوعنا لربنا، وصبرنا، وتسليمنا.. الحمد لله دائمًا وأبدًا… ولو شفتوا كلامي، ادعولي".