رنا سماحة ترد على تصريحات المنتج ممدوح شاهين: يا ريت كل واحد يحترم نفسه ويسكت

ردّت الفنانة رنا سماحة على تصريحات المنتج ممدوح شاهين الأخيرة بشأن مسلسل «النص التاني»، وذلك من خلال منشور نشرته عبر حسابها الرسمي على موقع «فيسبوك».

وقالت رنا سماحة: «من كام يوم طلع منتج واتكلم عن ندمه على إنتاج مسلسل أنا كنت واحدة من أبطاله، لكن قبل ما يقول كده لازم نسأل: هل المسلسل اتصرف عليه بالشكل المناسب؟ وهل اتخدمتله دعاية حقيقية؟ الإجابة ببساطة لا».

وأضافت: «نجوم العمل كمان ماخدوش مستحقاتهم كاملة لحد دلوقتي رغم إن المسلسل اتعرض من أكتر من 8 سنين، وكل الوعود اللي اتقالت قبل التصوير بخصوص الدعاية والأغاني وكل التفاصيل اختفت فجأة».

وتابعت رنا سماحة: «أنا وقتها خرجت من الشركة منهارة، ومقدمتش أي إجراء قانوني، وسيبت فلوسي واعتبرت المسلسل كله كأنه ماحصلش، وقلت خلاص أعتبرها تجربة وعدت».

وأكملت: «استعوضت ربنا في اللي حصل، لكن بلاش حد يفتح مواضيع قديمة مالهاش لازمة، وأعتقد إني مش أول حد يتعرض لمواقف زي دي».

واختتمت حديثها قائلة: «يا ريت كل واحد يحترم نفسه ويسكت، على الأقل احترامًا لأولاده، لأن لو حد بحث ورا الكلام هيعرف الحقيقة».