أحمد حلمي: فيلم «واحد تاني» بيعبر عني وده سبب نجاح الفيلم

كشف النجم أحمد حلمي عن كواليس فيلمه الجديد "واحد تاني" الذي تخطى حاجز الـ30 مليون جنيه في شباك التذاكر، وذلك بعد أسبوع من عرضه في دور العرض السينمائي المختلفة، مؤكدًا أن أحداثه تشبه حياته الشخصية.

وقال "حلمي": "مكنتش متوقع النجاح ده بصراحة للفيلم واتفاجئت وكنت منتظر أسمع رقم أقل من كدة خلال أول يومين من العرض".

وتابع: "هيثم دبور مؤلف الفيلم، يمتلك موهبة كبيرة، وتجمعنا علاقة صداقة من فترة طويلة، وبيعرف يكتب سيناريوهات بطريقة مختلفة وذكية وأنا من جمهوره وبحب اقرأ رواياته".

أما عن تقليده لرقصة المطرب أحمد سعد الشهيرة، قال: "بستعد عشان أقلد رقصته بشكل مختلف بس معرفتش".

واستطرد: "حسيت إن الفيلم يشبه حياتي الشخصية، لأني فعلا كنت فقدت الشغف، وده سبب نجاح الفيلم لأني كنت عايش الشخصية بشكل طبيعي، وبحاول دائما أرجع لشغفي بأني أبدأ من جديد، أنسى اللي فات وأحاول أفكر في الجديد".

وعن غيابه لمدة ثلاث سنوات عن السينما، قال: "أنا شايف ده فيه ميزة، لأن الحاجة الحلوة لازم تتأخر وتتعمل بشكل متقن، وأكيد نفسي اشتغل فيلمين في السنة، وليس كل فترة".

واختتم النجم الكوميدي حديثه: دايما بحب المخرج اللي ينجح في تقديمي بشكل مختلف ويبرز موهبتي وده للي نجح فيه مخرج العمل محمد شاكر خضير، وعرف يعمل اللي أنا بفكر فيه ويقدمني بشكل مختلف، وجاء ذلك مداخلة هاتفية في برنامج إنرجي الإذاعي.

#أحمد_حلمي لـ #إنرجي: #واحد_تاني وأفلامي الأخيرة بيعبروا عني.. وحاولت أقلد أحمد سعد بس معرفتش #عيشها_بإنرجي@ahelmy @WaelMansour pic.twitter.com/4PNtfogBRM

— NRJ Egypt (@NRJEgypt) May 9, 2022