بعد استغاثة نادر نور.. الملحن إسلام زكي يشكو من تجاهل المطربين له

أعلن الملحن والموزع إسلام زكى تضامنه مع الملحن والمطرب نادر نور، بعد الرسالة المؤثرة التى كشف خلالها الأخير عن معاناته فى العودة إلى الساحة الغنائية، مؤكدًا أنه يواجه أيضًا صعوبات كبيرة فى التواصل مع المطربين لعرض أعماله الفنية عليهم.

وكتب إسلام زكى عبر حسابه الرسمى على «فيسبوك»: «أنا باضم صوتي والله لصوت الملحن الكبير نادر نور، عشان الناس اللي بتبعت لى كلام وعشمها خير. معظم المطربين، لو مش كلهم، مش بيردوا تمامًا وبيتجاهلوا كل الرسائل والمكالمات، وبواجه صعوبة فى التواصل معاهم عشان أعرض شغلى عليهم، عشان الناس اللى بتسألنى: أنت مش متواجد ليه؟ اسألوهم هما مش إنا، عشان غالبًا أنا معنديش أى أعمال السنة دي».

وأضاف: «أنا باشتغل وبعمل اللى عليا سواء ملحن أو موزع، والحمد لله معنديش أغنية أخجل منها، وليا رصيد أتشرف بيه أغنية أغنية من اول ما بدأت فى 2008، أنا عمري ما هبطل أعمل الحاجة اللى بحبها وأعمل أغاني حتى لو هافضل أسمعها لوحدى فى عربيتى، بكون سعيد وأنا عارف إن ربنا إدانى الموهبة دي ولسه عندي كتير حتى لو مظهرش للنور، فأنا راضي جدًا الحمد لله وفى نعمة».