"الأهلي غير أي حد".. شريف إكرامي يعلن اعتزاله كرة القدم برسالة مؤثرة

أعلن شريف إكرامي حارس مرمى فريق بيراميدز اليوم الخميس اعتزاله كرة القدم.

وغرد شريف إكرامي عبر حسابه على موقع "إكس" قائلا:" بعد أكتر من 30 سنة جه الوقت اللي أودع فيه الملعب و أعلق الجوانتي".

واضاف: "جه وقت أني اخد قرار يمكن كل لاعب بيبقى عارف إنه هييجي في يوم من الأيام لكنه عمره ما بيبقى سهل، لأنك مش بتسيب شغلانة أنت بتسيب حياة كاملة".

وتابع: "شكراً لكل نادي لعبت فيه.. فينورد والجونة كل واحد فيكم ضاف لي كتير كانسان مش بس كلاعيب".

واستكمل: "شكراً بيراميدز اللي ختمت فيه و كنت محظوظ أكون جزء من جيل حفر تاريخ لنفسه و للنادي".

واختتم رسالته قائلا: "لكن هيفضل للنادي الأهلي مكانة مختلفة في قلبي.. الأهلي مش مجرد نادي لعبت فيه.. ده المكان اللي اتولدت فيه.. كبرت واتعلمت و نضجت فيه.. ومنه الناس عرفتني و حققت فيه كل اللي كنت بحلم بيه كلاعب.. الأهلي غير أي حد".