المؤلف والممثل رامي نادر يشكو من قلة فرص العمل ويوجه نصيحة

وجّه الفنان رامي نادر مجموعة من النصائح المهمة لمتابعيه عبر حسابه الرسمي على موقع «فيسبوك»، خاصة من محبي الفن والعاملين به، داعيًا إياهم إلى عدم الاكتفاء بالسعي في المجال الفني فقط، والبحث عن مصدر دخل آخر يضمن الاستقرار.

وكان رامي قد أعلن مؤخرًا بحثه عن فرصة عمل ثابتة، سواء من خلال مكتب أو من المنزل، مؤكدًا رغبته في نقل تجربته الشخصية للآخرين للاستفادة منها، حيث قال:
"أنا الحقيقة عايز استغل ده وإن الناس تستفيد من اللي حصلي.. (ما تعملوش زيي حتى لو كنت واثق من موهبتك واجتهادك وسعيك علشان ما تبقاش زيي".

نصائح رامي نادر من واقع تجربته

واستعرض رامي الأخطاء التي وقع فيها خلال مشواره، موضحًا:
"أولا الأخطاء اللي أنا عملتها ماتعملش زيها: كذا حد مشكورا بعتلي وطلب الـ cv، اكتشفت إني ماعنديش cv شغل عادي، أنا اشتغلت مؤلف ومخرج وممثل (اكتر حاجة اشتغلتها وكنت عايش في حدود عليها) وتدريب ورش تمثيل فقط، مافيش أي عمل تاني اشتغلته طول حياتي".

وأضاف:
"أنا خريج تجارة شعبة محاسبة، وآداب مسرح شعبة تمثيل. النتيجة ماتشتغلش فن فقط وبأكد حتى لو أنت موهوب عني مليون مرة أو مجتهد عني مليون مرة.. لازم يبقى عندك شغل تاني علشان يوم ما تقرر تغير تلاقي حاجة تشتغلها".

تحذيرات من واقع الوسط الفني

وتحدث رامي عن طبيعة العلاقات داخل الوسط الفني، قائلًا:
"مافيش حاجة اسمها صحاب أو عشم في الوسط الفني، النتيجة: أولا/ ماتضحيش بشغلك أو بنفسك علشان حد مهما كان صاحبك أو حتى أخوك.. ساعد لو تحب لكن ماتفضلش صحوبيتك على نفسك لأنه في العكس مش هيعمل أقل من اللي انت عملته. ثانيا/ مافيش وعود ولا كلمة تاخدها من حد وتتعشم وتعيش عليها لأنها ساعة الجد لما ماتحصلش هتحبط وتكتئب وتكره الناس وتكره نفسك، النتيجة اعتمد على نفسك لا تصدق وعود ولا تدي وعود لإن غالبا ماحدش قد الوعد ده".

الفن لازم يبقى هواية

واختتم رامي نادر رسالته مؤكدًا رؤيته لمستقبل العمل الفني، حيث قال:
"أخيرا.. شكرا لكل حد اهتم وبعتلي وفعلا فيه حاجات ممكن اشتغلها وتأمن الحياة، بعتذر لأي حد أنا كنت سبب إنه يحب الفن (إلا لو نجح)، أنا ماكانش قصدي أضرك والله، أنا كمان كنت بحب الفن لدرجة خلصت دراسة تجارة، ودخلت درست ٤ سنين مسرح وورشة أجنبية ومصرية، ونقلت اللي اتعلمته بكل أمانة زي ما أنا بقولك دلوقتي بكل أمانة لازم تشتغل شغل تاني والفن يبقى هواية، والأقل اهتمام في حياتك (احتياطي) لإن فيه ناس بينجحوا عادي من غير ما حد يساعدهم ولا يقف جنبهم وفيه اللي عندهم طرق تانية، لو ضامن النجاح يبقى اشتغل فن بس".

رسالة اعتذار مؤثرة

وفي ختام منشوره، وجّه رامي رسالة اعتذار لأسرته وابنه، قائلًا:
"كان نفسي أبقى مصدر فرح وفخر لأهلي وابني اللي بعتذرلهم بردو على الإحباط اللي عايشينه معايا، فعلى الأقل ما أبقاش مصدر خيبة أمل، آه هدور على شغل أعيش منه بعد الأربعين ومش شايف إنه عيب عليا أو يأس مني".