خاص| والدة العروس صاحبة شروط عقد القران: بنتي ما عملتش حاجة غلط

قالت والدة عروس كفر الدوار صاحبة شروط عقد القران بالبحيرة، خلال لقاء خاص أجراه موقع "العاصمة": "والله الناس مبسوطة الناس مقالتش حاجة وحشة بالعكس حماتها طول الليل معاها على التليفون وخالته وأخته، وهو برضو كويس معاها بس هو زعلان ومتضايق من الألفاظ الخارجة اللي اتقالت على الفيديو، الألفاظ اللي اتقالت وحشة أوي توجع أي راجل، وهو راجل وشخصية محترمة، موجوع من الكلام مش موجوع من بنتي بالعكس اليوم عدى عادي وسهروا مع بعض في الإسكندرية".

وأضافت: "اللي عمل مشكلة هو ردود الناس على السوشيال ميديا، هو يتشتم ليه هو عمل ايه! أو بنتي عملت ايه غلط؟، معملتش حاجة غلط، هي استشهدت بحديث الرسول عليه الصلاة والسلام، وقالتله بعد اذن حضرتك أنا عايزة أقول كلمتين، قالها اتفضلي وحماها سكت الناس، وقالتله أنا اخترت احسن زوج واختياري كان صح وانا لما اختارت كنت انت السند والزوج الصح ليا، وبعد كده قالتله ممكن أطلب منك طلب؟ زي ما انا هحط اهلك في عيني حط اهلي في عينيك".

وتابعت والدة العروس: "بنتي دي أهلي وروحي وشقيانة، احنا حارمين نفسنا من أبسط الأشياء عشان نسعدها ونجيب لها حاجتها، والبنت مقدرة ده ومقدرة إن أبوها وأمها شقيانين علشانها، وأهل العريس ناس كويسين وفرحانين بيها جدا".

وتصدرت أمنية طارق عروسة كفر الدوار، تريند مواقع التواصل الاجتماعي، بسبب شرطها على العريس قبل كتب الكتاب.