هاني شاكر: «الناس دلوقتي بتسمع بوسطها»

أبدى الفنان هاني شاكر، أمير الغناء العربي ونقيب المهن الموسيقية، رأيه بمستوى الذوق الفني الذى وصلنا له مؤخرًا في مصر، مؤكدًا أنه اختلف كثيرًا عن ما كان من قبل.

وقال شاكر: "جزء كبير النهاردة من محاربة الفساد الفنى أنه لازم يكون فيه فن مضاد والجمهور يبقي عنده ده وده، لكن للأسف دلوقت بنتعمد على الفن أنه كل ما يقدم على السوشيال ميديا فقط لكن الحفلات اللي كانت بتتقدم في الإذاعة والتليفزيون وكانت بتستقطب الأسر من كل العالم العربي مبقتش موجودة وأتمنى أنها ترجع تاني للساحة الفنية".

وتابع: "مصر قادرة على إعادة "أضواء المدينة" و"ليالي التليفزيون"، وأنها تنظم الحفلات دي في كل المحافظات وتتعمل في بلدان عربية زي ما كانت بتتقدم زمان".

واستطرد: "كل ما كان يقدم في الحفلات كان محتاج سمع والناس بتروح تسمع وأنا أذكر مقولة للأستاذ عبد الوهاب في مرة من المرات وهو بيتكلم عن الفن كان بيقول الناس زمان كانت بتسمع بودنها أما الناس دلوقتى بقت بتسمع بأيديها، اللي هو وقتها كان بيقول أنه العصر ده كانت الناس بتسقف كتير مع المطرب، أنا بقي بقول دلوقتى الناس بتسمع بوسطها".

واختتم نقيب المهن الموسيقية حديثه متسائلا: "هل الفن والموسيقى والأغاني اتعملوا علشان يساعدوا اللي عاوز يرقص بس؟ دي كارثة، دور الفن مش كدة خالص"، وجاء ذلك خلال استضافته مع الإعلامية إنجي أنور، مقدمة برنامج مصر جديدة الذي يبث على شاشة "etc"، مساء الأربعاء".