متصل يستغيث على الهواء: مراتي بتضربني وبتهزقني وواخدة كل فلوسي وأنا ماليش حد

شكى متصل يدعى أحمد من القليوبية من ضرب وعنف زوجته له ودخل في نوبة بكاء على الهواء، وروى معاناته معها، موضحًا أنها تقوم بضربه بإستمرار على الرغم من أنه يلبي لها جميع احتياجاتها.

وقال "أحمد" :"أنا متزوج بقالي 20 سنة ومراتي بتشتمني وبتضربني بـ"النونيات" وبتمد أيدها عليا، وأنا كنت في السعودية وببعت لها كل اللي هي عايزاه، وأخدت كل فلوسي وخلصتها ومكنتش بتحط حاجة في جيبي".

وأضاف "أحمد" :"أنا عندي 55 سنة ومش عارف أعمل ايه مع مراتي، وفكرت انتحر، ودلوقتي لما نزلت من السعودية بعد أزمة كورونا بشتغل أي حاجة، بعد ما مراتي أخدت فلوسي كلها".

وتابع: "عندي 3 أبناء، وزوجتي بتضربني قدامهم، وهم كمان بيمدوا أيديهم عليا، ومش عارف أعمل إيه في الأم دي دي كل يوم مبهدلاني، وأنا ماليش حد ولا أخ ولا أخت".

وفي سياق متصل، علقت الإعلامية ياسمين عز قائلة:"أهدى كدة يا استاذ أحمد، وكل مشكلة وليها حل، ومافيش حاجة بعيدة عن ربنا ومتفكرش أبدا في الانتحار، وأنا من رأيي القلة الرجال اللي بيضربوا من مراتتهم يعملها محضر".

فيما أجاب الشيخ إبراهيم رضا أحد علماء الأزهر، على مشكلة المتصل بقوله: "الحالة دي تحديدا أنا سمعت طرف ومسمعتش التاني، والحاجة المهمة أنا بعيب على الزوج مش الزوجة لأن بعض الناس فاهم العلاقة الزوجية فهم عقيم".

وتابع: "الزوج هو اللي أهمل في حق نفسه وكرامته وكبريائه، ومفيش حاجة اسمها مضطر وربنا قال إن الله لا يغير من ما بقوما حتى يغيروا ما بأنفسهم، سيدنا النبي علمنا كدة لو حد جالك وقالك ده فلان قلعلي عينيا وبيديكي عينيه متتعجليش إلا لما تسمعي الطرف التاني لأن ممكن الإتنين يكونوا بيقلعوا عين بعض".

واستطرد: "عنف المرأة ضد الرجل موجود بنسب، وعنف الرجل ضد المرأة بردو موجود بنسب، الفكرة إن دي حالة شاذة، وربنا قال فابعثوا حكما من أهله وحكما من أهلها لما تبقى ست أو راجل حتى بهذا الشكل مالوش كبير؟".

واختتم أحد علماء الأزهر حديثه بقوله: "لما أب بيضرب من أم ويجي يقول لولاده الحقوني كدة أنت مش بتربي ولاد أنت بتربي مجرمين هيخروجوا للمجتمع شايفين حالات عنف، وطالما ملهاش أهل روح لأقرب قسم شرطة وأسجل محضر"، وجاء ذلك في برنامج الإعلامية ياسمين عز، "كلام الناس"، المذاع عبر فضائية "مصر mbc".