شوبير: الحكام هددوا بعدم التحكيم لو ما حصلوش على مستحقاتهم

علق الإعلامي أحمد شوبير، حارس مرمى الأهلي ومنتخب مصر السابق، على أزمة مستحقات التحكيم في مصر قبل بداية الموسم الكروي الجديد.

أقرأ أيضًا..كلوب: محمد صلاح تمكن من صناعة تاريخ

وأضاف "شوبير" خلال تصريحات ببرنامجه الإذاعي:«هل ممكن تروح محكمة والمحامين يروحوا والقضية تاخد مجراها، وبعدين القاضي يوم المحكمة ما تلاقوش على المنصة، ممكن أي حد يغيب المحامي مثلا يغيب إنما القاضي لأ، نفس الأمر في (قضاة الملاعب) السادة الحكام في مصر هم أغلب ناس في المنظومة، كانوا بياخدوا 150 جنيه في المباراة لغاية ما وصل دلوقتي حكم الساحة بياخد 7 آلاف جنيه».

وأوضح الإعلامي :«المشكلة إن فلوسهم ومستحقاتهم بتتأخر، عكس لاعب كرة القدم لو تأخرت فلوسه الفيفا يجيبها المحكمة الدولية أي جهة إنما الحكام فلوسهم تتأخر عادي».

وأضاف شوبير: «في ظل جهودي لحصول الحكام على حقوقهم، قام واحد ابن حلال من بتوع اتحاد الكرة راح لهاني أبو ريدة قالوا الحق شوبير بيعمل مؤامرة وبيجب الحكام وبيقعد معاهم شكله هيعمل مؤامرة».

وأردف: «بعد ذلك الحكام تم منع صرف مستحقاتهم بقرار من أحمد مجاهد وبعدين صرفوا الفلوس على مراحل، موضوع التحكيم دائما فيه مشكلة وفيه حدودتة ما تعرفش ليه، انت كاتحاد كرة بتاخد فلوس عن قيد اللاعبين من الأندية طب ليه ما بتاخدش فلوس الحكام من الأندية، وبعدين انت جايب مارك كلاتنبرج من إنجلترا عشان تدخله في مشكلة الحكام قبضوا ولا مقبضوش وعلى فكرة الحكام حاليًا هددوا بعدم التحكيم في الموسم الجديد لو ما حصلوش على مستحقاتهم».

واختتم شوبير: «أنت من الأول وفر البيئة الجيدة للنجاح أنا في الوضع ده كده خايف وقلقان، وكلاتنبرج قال هقعد مع جمال علام، يا ريت ما تدخلوش الراجل في الدوامة دي».