بعد أزمتها بـ«القاهرة السينمائي».. هند عاكف باكية: «صعبان عليا تاريخي وتاريخ عيلة عاكف وبعتب على حسين فهمي»

كشفت الفنانة هند عاكف، لأول مرة عن تفاصيل أزمتها في مهرجان القاهرة السينمائي بدورته الـ 44، ومحاولة منعها من دخول حفل الافتتاح.

وروت "عاكف" باكية: "ينفع الكلام ده مع فنانة بتشتغل وهي عندها 4 سنين، أنا كنت بدخل المهرجان ده والدعوة بتبقى في العربية، الدعوة كانت من زميل مش هذكر اسمه، قالي يا هند أنا شفت الفيديو بتاعك وأنتي عايزة تروحي المهرجان، قولتله أيوه أنا عايزة أروح، قالي أنا مش هروح عندي ظروف ومسافر وهبعتلك دعوتي، مضيفة: "قالي بس متبلغيش حد إني أديتك دعوة عشان هما ممكن يبعتولك دعوة، ولو بعتولك دعوة هاتيلي الدعوة، عشان ممكن أديها لحد تاني".

وتابعت: "يومها أنا نزلت كنت ماسكة الفستان وكنت نازلة بالدعوة من البيت، أنا دمعتي نزلت دلوقتي عشان صعبان عليا تاريخي وتاريخ عيلة عاكف، اللي أنا شايلاه طول عمري ومحافظة عليه، يقوم المنظمين يعملوا كده، أنا معرفش راحت فين الدعوة ولقيت نفسي وصلت، قولت استحالة يعملوا معايا موقف زي ده ولازم يدخلوني، أو يتصلوا بالإدارة جوه وهيدخلوني من غير مشاكل".

وأضافت: "أنا ليا تاريخ بجد أنا مش بهزر، أيا كان كبير أو صغير، أنا ليا تاريخ وليا وضعي وأعمالي الفنية المحترمة، بغض النظر إني بعدت شوية وليا تاريخ أيضًا في الفترة اللي بعدها، أنا مبعدتش عشان اتفسح أنا كنت بعمل حاجة لصالح بلدي وللمواطن المصري".

واستكملت: "أنا هعتب على الأستاذ حسين فهمي، كرئيس مهرجان مش كفنان، المفروض يا أستاذ حسين كنت بلغت إدارة التنظيم إن لو حصل مشكلة نحلها إزاي؟ لو حصل مشكلة على الريد كاربت، وفيه فنان أو فنان جاي هيدخل بيته أو بيتها، ده بيتي المفروض، يقولولها اتفضلي محدش يمنعها، أولا لتجنب المشاكل، ثانيا، لأن احنا فنانين والمهرجان ده مهرجان بلدنا ومهرجانا احنا".

وأردفت: "بيقولوا القاعة بتتسع لـ 1050 كرسي فقط، ومش هنقدر نستوعب كل الفنانين أو مش هنقدر ندعي كل الفنانين، لو الدعوات راحت للفنانين بس الناس كانت هتدخل وترتاح، البلوجر مع احترامي ليهم، الفنان الأول وبعدين البلوجر، السنة اللي فاتت كان قاعد جنبي 3 فيهم 2 دكاترة، وميطلعش البلوجر على الريد كاربت وهند عاكف ميتبعتلهاش دعوة، وعادي آخد دعوة من زميل، وأنا جهزت نفسي وعايزة أروح مهرجاني، والناس تعرف أني رجعت وكانوا بيمنعوني، قولتلهم استحالة الدعوة نسيتها فعلا، وأنا أول مرة أقول كده، وساعات في المهرجانات اللي فاتت كانت الدعوة بتكون في العربية وأدخل عادي".

واختتمت هند عاكف حديثها قائلة: "حسين فهمي عمل تقريبا مداخلة، قال هند تقريبا جت المقر وأنا طبعا مقولتش إني عاملة فستان ولا الكلام ده، يمكن هم بلغوا رسالة غلط، مرحتش أوريهم الفستان هدخل بيه أو مش هدخل بيه؟، لكن هو طالما عرف إني جيت المقر، يعني أنا عايزة أحضر المهرجان، وكلمته، كان ممكن يقول هاتي دريس يصلح للمهرجان، والمفروض كان يكون في تعليمات، والمشكلة اتحلت في ثواني على فكرة، وفي أكتر من شخص تدخل بصراحة"، وجاء ذلك خلال استضافتها مع الإعلامية راغدة شلهوب ببرنامج "نص الكلام" المذاع عبر فضائية "النهار".

وجدير بالذكر أن، منع منظمي حفل افتتاح مهرجان القاهرة السينمائي في دورته الـ 44، الفنانة هند عاكف من التواجد على الريد كاربت من الدخول، والتي انطلقت الأسبوع الماضي بدار الأوبرا المصرية.

وارتدت عاكف فستانًا غير مألوف ومختلف، مطبوع عليه صور عدد من رموز السينما المصرية، على رأسهم: عادل إمام، وأحمد زكي، ومحمود عبدالعزيز، وشويكار، وغيرهم الكثير.

وعن أسباب منعها من الدخول، علم موقع "العاصمة" من مصادره الخاصة بأن السر وراء ذلك، يعود إلى عدم حملها دعوة لحضور المهرجان.

ونشبت مشادة كلامية قبل وقوف "هند" على السجادة الحمراء، حيث منعها المنظمون من الدخول، وقالت منفعلة: "عيب أنا فنانة من حقي أدخل.. عيب كده.. عيب اللي بيحصل ده".