«الرقص مش حرام وأنا محجبة طوال الوقت وعملت 37 عمرة وحجيت 5 مرات».. أبرز تصريحات فيفي عبده

كشفت الفنانة فيفي عبده، أنها لا تخاف من الموت ولكنها تتمنى أن تعيش 100 عام، مشيرة إلى أنها قامت بالحج 5 مرات والعمرة 37 مرة، وذلك خلال لقائها في برنامج «عندي سؤال» والتي تقدمه الإعلامي محمد قيس عبر قناة «المشهد».

وقالت فيفي عبده خلال لقائها: «مش خايفة من الموت وشفت تربتي وموضباها لكن نفسي ربنا يديني عمر شوية لأني لسه معشتوش، كل ما أركع وأصلي أقوله يارب إديني شوية عمر عايزة أعيش أكتر من كده عايزة أعيش 100 سنة مثلا».

أما عن الموقف الذي جمعها بخبيرة الأبراج ليلى عبد اللطيف، تحدثت فيفي قائلة: «ليلى عبد اللطيف قالت إني هعيش لـ80 سنة قابلتها في الطيارة قلت لها مش عاجبني الـ80 دول هل من مزيد؟ خافت مني قالتلي خلاص 90، العمر بإيد ربنا، نفسي أعيش 100 سنة أشوف اللي بحبهم أشوف وأعيش مع أحفادي».

وأضافت: «مواجهة ربنا أنا مطمنة طول عمري ماشية بما يرضي الله مظلمتش حد بساعد الغلبان أنا غلبانة زيهم، إنسانة واضحة كل دي حاجات تخليك تبقى مطمن في الحياة، لكن ربنا هيعمل فيا إيه أنا راضية بكل حاجة، ربنا يهديني لو جاتلي الهداية هقولها إيه لأ كخة».

أما عن نظرتها للرقص، أوضحت فيفي: «الرقص حرام ليه؟ هو مش شغل زي أي حاجة الباليه حرام؟ في حاجات كتير حرام، الرقص دا شغل زي أي شغل ليه احترامه وليه ناسه اللي بيتفرجوا عليه وليه اللي بيقدروه ويحترموه».

واختتمت حديثها: «أنا متحجبة طول الوقت، الكلام دا يتقال للناس الفالته أنا بعتبر إني محجبة لأني مش بعمل حاجة غلط ومش بجيب في سيرة الناس محجبة في لساني وفي كل تصرفاتي، مطلوب مني إيه أكتر من كده وإذا كان على الشغل لو ربنا قالي في أي وقت إلبسي الحجاب هلبسه».

اقرأ أيضًا: ستيفاني عطالله تكشف حقيقة وجود جزء ثاني من «كريستال»