«ميدو»: صاحبت ملكة جمال بلجيكا.. ومراتي أحلى منها
كتب: مؤمن نصر
علَّق الكابتن أحمد حسام ميدو، على تصريحاته الأخيرة بخصوص لعبه للكرة من أجل البنات قائلًأ: "حافز لعب الكرة عشان البنات كنت ساعتها صغير وعندى 17 سنة، وكلامي ده كان خلال قصة لأن البنات اللي شفتها هناك حلوين ومش معنى كده أني كنت في مصر واقع يعني".
وقال أحمد حسام ميدو خلال استضافته ببرنامج "أسرار" مع الإعلامية أميرة بدر المذاع على قناة النهار: "حلمي اتحقق وصاحبت ملكة جمال بلجيكا، وسبتها لأن حياتنا مختلفة ومحبتهاش بس كانت حلوة، ودلوقتي هي ممثلة مشهورة في بلجيكا، كان مشكلتي على صورها اللي على المجلات، ويسرا مراتي أحلى منها وقمر، وكل ما الوقت بيعدي بحبها اكتر».
وتابع: «أي راجل وست عشان يعرفوا يعيشوا محتاجين لغة حوار، مش عيب إن الراجل يعبر عن حبه لمراته والعكس صحيح، مبدأ الرجالة بتاع الست للبيت ده مش عندي، أنا عندي أخرج معاها وأسهر ونرقص سوا ونلبس أحلى لبس، وقفشتني كتير، واللي بيحللي مشاكلي معاها هي حماتي وأمي».
وأضاف ميدو قائلاً: «الست الجدعة اللي تحافظ وتبقى باقية على بيتها ومش معنى كدة أنها تبقى مهزقة، لأن فيه صحاب كتير وحشين أوي، متسمعيش ليهم، وبرامج الستات اللي بتنصح الستات كلهم مطلقات، طيب ماتسبيهم، ليه تنصحيهم وبتخربي بيوتهم، وهما أربعة أو خمس ستات بينصحوا الستات كلهم مطلقات متسمعهومش لأن هدفهم مش أنتي ولكن شغلها فقط، مفيش ست يبقى عندها شخصية قدام جوزها، لازم يبقى فيه تنازلات من الطرفين».
برنامج "أسرار" تقدمه الإعلامية أميرة بدر على شاشة النهار يومياً في تمام الساعة التاسعة والنصف مساءً، تستضيف من خلاله عدد من نجوم الفن والرياضة والسياسة في مصر.
اقرأ أيضاً: «محارب» يتصدر التريند على جميع مواقع التواصل الاجتماعي
