أحمد حسام ميدو: حازم إمام عمره ما ينزل انتخابات قدامي عشان عارفني هكسبه
كتب: مؤمن نصر
علَّق الكابتن أحمد حسام ميدو على واقعة المرتبات مع مرتضى منصور في نادي الزمالك، قائلًأ: "مرتضى كتب حازم مدير الكرة ومرتبه 100 ألف جنيه، وكتب ميدو مدير فني ومرتبه 140 ألف جنيه، اخدت منه الورق والقلم وعكست الكلام وقلتله ميصحش حازم يبقى أقل مني وهو أقدم مني، وحازم ميعرفش القصة دي بالمناسبة لأني لأول مرة أقولها".
وقال "ميدو" خلال استضافته ببرنامج "أسرار" مع الإعلامية أميرة بدر المذاع على قناة النهار: "حازم إمام غلطته إنه حمل نفسه فوق طاقته وتصدر المشهد وطلع على المسرح، بس هل هو سبب خراب الكرة في مصر، غلط انه اتفاوض وهو مش شغلته".
وتابع: "المفروض في ناس شغلتها الحسابات والتفاوض، خد قرارات فنية كتير خاطئة، لأن مصر كانت ممكن تكسب البطولة دي، ومتفائل بحسام حسن، وممكن أمسك نادي الزمالك في وقت من الأوقات، عشان أمسك الزمالك لازم ابقى جاهز للمواجهات هدافع حتى لو هتسجن، في ناس كتير اكيد مش عايزاني وهتحاربني، انا أصغر لاعب درب الزمالك وأصغر لاعب مثل مصر وإن شاء الله هبقى أصغر رئيس للزمالك، وعمري ما أنزل انتخابات قدام حازم لكن ممكن ابقى نائب له، وحازم مينزلش قدامي لأنه عارف أني هكسبه».
برنامج “أسرار” تقدمه الإعلامية أميرة بدر على شاشة النهار يومياً في تمام الساعة التاسعة والنصف مساءً، تستضيف من خلاله عدد من نجوم الفن والرياضة والسياسة في مصر.
اقرأ أيضاً: «ميدو»: صاحبت ملكة جمال بلجيكا.. ومراتي أحلى منها
