بسمة وهبة تهاجم ميار الببلاوي: «ساكتة ليه من يوم ما الحلقة اتعرضت»
كتب: نسرين إبراهيم
ردت الإعلامية بسمة وهبة على تصريحات الفنانة ميار الببلاوي، والتي اتهمت فيها برنامج "العرافة" بخضوع تصريحاتها من خلاله عن طلاقها 11 مرة وعودتها لزوجها دون محلل للمونتاج، وذلك بعد الهجوم عليها من أحد الشيوخ.
وقالت بسمة وهبة، في مقطع فيديو عبر حسابها على موقع الصور والفيديوهات "إنستجرام": "أنا هتكلم عن الحتة اللي تخصني.. مع إني عمري ما رديت على حد حتى لو الكلام كدب وده بيحصل كتير أوي في العرافة.. ناس وطلعت حلقتها ما عملتش تريند أو عملت تريند وهل من مزيد فيتقولوا بحاجات عن نفسهم ويعملوا فضايح لنفسهم في سبيل التريند.. فأنا بطنش وأقول خليهم يأكلوا عيش".
وأضافت: "أستاذة ميار إنتي شغالة في مجالنا في مجال الإعلام وأظن المونتاج مجابش كلام وحطه على لسانك ولا جاب كلام بصوت واحدة تانية وحطه على صوتك.. ده صوتك وكلامك اللي حضرتك قولتيه".
وتابعت: "وأظن إن حضرتك طلبتي في كلام إنتي اتسرعتي وقولتيه واحنا بعد الحلقة قولتيلي ونبي يا بسمة شليه الحاجات دي ما ينفعش تتساب مش عايزاه.. وأنا نبهت قدامك وقولتلهم شيلوا اللي الأستاذة ميار مش عايزاه .. حصل ولا محصلش وإذا محصلش تعالي كدبيني.. لكن شغل دول عملوا مونتاج.. لأ ده كلام لا حلو في حق المحطة ولا في حقي ولا في حق البرنامج.. مش هقبل بده".
واستكملت بسمة وهبة حديثها، قائلة: "وعايزة أسالك سؤال هو حضرتك من يوم ما الحلقة اتعرضت ولاقيتي إنه الكلام اللي متقال مش كلامك ومعمول مونتاج فيه حضرتك ساكتة من يومها لحد النهاردة ليه.. معملتيش البوليكة اللي عملتيها ليه.. ولا الكلام ده حصل لما الشيخ طلع واتكلم عليكي".
اقرأ أيضا: السيد أسامة بعد مشاركته في «خالد نور وولده نور خالد»: «روحت الحسين ودعيت ربنا أنجح»
View this post on Instagram
