لبلبة: عاصرت كل الأجيال... ومحظوظة إني اشتغلت مع الكبار

أعربت الفنانة الكبيرة لبلبة عن سعادتها الشديدة بتكريمها من مهرجان بردية لسينما الومضة في دورته الأولى.

وقالت لبلبة على هامش التكريم في كلمة لها: أنا مش محضرة كلمة ومكنتش عارفة إني هتكلم واللي في قلبي من غير ترتيب، إني بشكر المهرجان لتكريمي ودا شيء يسعدني جدًا إنه يكون هو اللي بيقدملي ده على رحلتي، وشرف أما يبقى باسم عاطف الطيب وهو اللي أعاد اكتشافي وبعد ما كنت بضحّك الناس بكيتهم بالفيلمين اللي عملتهم معاه.

وأضافت لبلبة: ضد الحكومة من أجمل أعمالي اللي قدمتها مع عاطف الطيب، وهو مكنش مبسوط مني في البداية وكنت برجع أعيط لوالدتي عشان مش بيقولي هايلة بعد المشهد، ووالدتي قالتلي كلميه وأما كلمته أسأله أنت مبسوط مني قالي أيوة قولتله عشان المخرجين بيقولولي ممتاز بعد ما بخلص قالي طالما قولتلك اللي بعده يبقى عجبني.

وأضافت لبلبة: أجمل أيام حياتي مع العبقري نور الشريف وأنا محظوظة إني اشتغلت مع الكبار، وربنا اداني العمر وعاصرت الكل، وأصحابي راحوا وماتوا وآخرهم صلاح السعدني، وإحنا بنعزي نفسنا لأنه كان حاجة عظيمة، وهو غالي عليا الله يرحمه ومش ممكن هننساه.

اقرأ أيضا: بعد دهسه شخصًا.. عصام صاصا: «صورته مبتفارقش عيني»