خالد يوسف: نجيب الريحاني أهم ممثل في تاريخ مصر

أكد المخرج خالد يوسف أنه لا يتفق مع رأي الزعيم عادل إمام في الفنان نجيب الريحاني، وأنه يرى أن الأخير أهم ممثل في تاريخ مصر.

قال خالد يوسف أثناء ظهوره في "بالخط العريض" على شاشة الحياة: " نجيب الريحاني هو أهم ممثل في تاريخ مصر وهو من أهم الممثلين العالميين، السينما لما بدأت جابوا الممثلين من المسرح وكلهم مثلوا بنفس طريقة المسرح، ومعروف إن في حالة من التضخيم عشان توصل لكل الجماهير، فلما جم يصوروا سينما منتبهوش إن في كاميرا بتقرب لعينك وبتبقى على شاشة السينما ومش محتاج تضخيم في الآداء، منتبهوش لدة وعملوا أداء مسرحي في السينما لغاية ما جه نجيب الريحاني في أوائل الثلاثينات وعمل تمثيل طبيعي وأسس مدرسة فيها كل ممثليننا من سنة 1931 لغاية اللحظة دي. هو واحد من رواد التمثيل في العالم".

وأضاف خالد يوسف: "في السينما الفرنسية في أواخر العشرينات كانوا برضه بيمثلوا بطريقة المسرح وانتقلت السينما الفرنسية والأمريكية في نفس توقيت نجيب الريحاني، هما اللي جددوا فكرة التمثيل إنك تبقى صادق وتعمل الشخصية بجد، نجيب الريحاني محدش يعرف يجيب الآداء بتاعه، مشكلته إن مش باقي منه عالشاشة غير 7 أفلام".

كان عادل إملم قد قال عن نجيب الريحاني: "بشوفه في شخصية واحدة، دايما الراجل المطحون والغلبان، مشفتوش عمل الدكتور الكوميدي، هو عمل كوميديا من نوع معين ومدخلش البيت المصري. مشفتوش أب لأسرة وطلع من خلال دة كوميديا. وبرضه البدلة بتاعته التعبانة".