والدة المخرج محمد سامي: مي عمر تستاهل اللي هيا فيه وأكتر

تحدثت النائبة صبورة السيد والدة المخرج محمد سامي عن ابنتها الفنانة الشابة ريم سامي وزوجها محمد المغازي بعد حفل زفافها مؤخرًا، كما تحدثت عن زوجة ابنها مي عمر، وذلك خلال تصريحات تليفزيونية.

وقالت النائبة صبورة السيد: ريم كانت مالية علينا البيت وكانت دلوعة البيت وأخدت النصيب الأكبر من الدلع في البيت مع إنها مسؤولة، ومحمد سامي دلعها وكان بيحس إنها بنته مش أخته، وباباها بعد ما اتجوزت كل ما يكلمها يعيط لكن أنا متماسكة شوية ومفتقداها جدا لأنها طيبة وحنونة وهادية ونسمة في البيت، وهي وباباها قصة تانية وإحساسهم ببعض غريب.

وعن زوجة ابنها الفنانة مي عمر، قالت: هي بنتي ومرات الغالي وأم الغاليين وعندها مؤهلات كتير أوي أنها تبقى أم أحلى أحفاد وأحلى حفيدات هي غالية وحنونة ومؤدبة وتستاهل اللي هيا فيه وأكتر.

وعن خوفها من الحسد على علاقة ابنها وزوجته قالت: بقول الله خير حافظا وبنقرأ قرآن وبنقول يا رب، بس ليه الناس مبتحبش تشوف اتنين بيحبوا بعض، وعاوزين يشوفوا الناس بتاكل في بعضها، هل الناس بتحب المشاكل؟، كلنا بنحب هدوان السر وراحة البال وإحنا ارتبطنا بفنانين زمان، فاتن حمامة وشادية ومريم فخر الدين ولبنى عبد العزيز وكنا بنحب نشوف الرومانسيات والحب بتاعهم لكن دلوقتي بنستغرب أن إحنا نشوف زوجين حلوين ودول نموذج ويا ريت كل راجل يبقى بيهتم بمراته وهي تهتم بجوزها ويبقوا قدوة كويسة لعمار البيوت.