أيمن نور الدين يكتب: تامر عبد المنعم.. اللي يقعد على الأرض.. يستحق الكرسي!
كتب: سماح غنيم
الفنان تامر عبد المنعم خدنا بعبلنا وتلوثنا ومهرجاناتنا وحموبيكنا وشاكوشنا وسوشيلنا وتيك توكنا وكل غبار وبلاوى وسلببات عصرنا الحالى
خدنا من تقزمنا .. واستستهالنا وركاكتنا واسترخاصنا وبيعنا لريادتنا ونفسنا
وراح دالق علبنا جردل مية ساقعة .. خلانا نفوق لمدة ساعتين من خلال عرض "نوستالجيا " على مسرح السامر اللى تم احياؤه حديثا وبقى شكله يفرح القلب
تامر عبد المنعم سهانا وقعدنا عالكرسى ورجع بينا ربع قرن للوراء
وخلانا نفتكر اجمل ما فينا ولينا
و راح رامينا مرة واحدة على جمال الثمانينات والتسعينات فى مصر سواء سينما او ومسلسلات اومسرح او اغانى
كله حلو حلو
وخلى جمهور الصالة المزحومة عن آخرها " المقاعد لا تستوعب الحاضرين " يقول فى نفس واحد
يااااه انارينا كنا حلوين اوى
ايشى ضد الحكومة وجرى الوحوش والكيت كات والارهاب و الكباب والكيف و و
وليالى الحلمية والمال والبنون والضوء الشارد وبوابة الحلوانى وهو وهى
ومسرحيات كانت بتنور لبالى القاهرة والأسكندرية زى مسرحيات الزعيم وصبحى وسمير غانم ومحمد نجم ووحيد سيف وغيرهم
واسامى كبيرة زى وحيد حامد وعمر خيرت وجمال سلامة واسماعيل عبد الحافظ و محمد صفاء عامر ومحمد جلال عبد القوى وغيرهم وغيرهم
فرق شبابية بتغنى وترقص واستعراضات وابهار وحماس وشغف ولسه فيه أمل فى بكره
قد ايه احنا كنا حلوين اوى وكبار اوى .. ايام ما كان العرب بيجولنا يشوفوا فننا فى القاهرة .. مش العكس
ياسلام لما يكون المسئول الكبير فى وزارة الثقافة هو فى الاساس فنان وإنسان وبيفكر بره الصندوق وعايز يعمل حاجة وهو فعلا عامل حالة على المسرح
وياسلام لو عندنا مسئولين كتير زى تامر .. كانت حاجات كتير اتغيرت
ولما يكون عندك مسئول عامل عرض ومش لاقى كرسى قاعد عليه فقعد عالارض .. امسك فيه بايدك وسنانك
عشان ده بقى قليل فى الزمن ده
