مجدي عبد الغني: إدارة بيراميدز فاكرين نفسهم ماسكين ليفربول

وجه مجدي عبد الغني، نجم الأهلي السابق، رسالة نارية لإدارة نادي بيراميدز، ردا على البيان الذي أصدره هاني السعيد، المدير الرياضي بالنادي السماوي على خلفية الأحداث التي شهدتها مباراة الأهلي، وقال ساخرا: إدارة بيراميدز فاكرين نفسهم ماسكين ليفربول.

وأضاف مجدي عبد الغني، في تصريحات تلفزيونية: المشكلة إن هاني سعيد، مش بيرد على تليفونات، الناس إللي ماسكين بيراميدز فاكرين نفسهم ماسكين مانشستر يونايتد، ليفربول، بايرن ميونخ، ماتردوا على التليفونات، لما نعوز منكم حاجة ونكلمكم ما تردوا علينا عشان ناخد المعلومة صح وتفهمونا الدنيا ماشية إزاي.

وتابع: انتوا فضلتوا محاوطين على بيراميدز وكإنه سر حربي، لحد ما حتى مفيش مشجع بيشجع بيراميدز، مالوش جمهور أصلًا، محاوطين على بيراميدز ليه؟ ما تفتحوا واعملوا مؤتمرات صحفية واتكلموا مع الإعلام.

وأكمل: يعني إيه هاني سعيد، يطلع بيان يقول بنحترم كل الأندية؟ شئت أم أبيت إنت لازم تحترم كل الأندية، مش جديدة إنك تطلع بيان تقول بنحترم كل الأندية، الجديد إنت هتعمل إيه مع اللعيبة اللي غلطت، هو ده الجديد اللي لازم تطلع تقوله عشان الأندية اللي مقدمة شكاوي، والناس اللي اتهانت تعرف إن حقها راجعلها وتعرف إن في إدارة قوية في بيراميدز.