خالد سليم: والدتي كانت مسمياني بيتهوڤن.. وزوجتي بتحبني كمطرب أكتر من الممثل

تحدث الفنان خالد سليم، خلال لقاء له للبرنامج الإذاعي "لمن يهمه الفن" والذي تقدمه المذيعة أميرة نور على نغم  FM، عن حياته الشخصية وبداية مشواره مع الفن.

وجاء أبرز تصريحات خالد سليم من خلال البرنامج كالتالي:

- موهبة الغناء بدأت عندى من ٧ سنين، وأول آلة عزفت عليها هى الميلوديكا، وعزفت عليها أغنية "فى يوم و ليلة" وأهلي دعموني بشكل كبير عشان موهبتي تظهر للنور.

- والدتب كانت بتحبني  أغني لها أغانى عبدالحليم، فيروز، وردة ومحمد عبد الوهاب وكانت مسمياني بيتهوڤن.

- حفلة العندليب كانت  أول حفلة أعملها للجمهور الكويتي، وعملت كل جهدى عشان أتواجد بشكل لائق وكان مسؤولية عليا انى اغنى اغانى العندليب عبد الحليم حافظ والتذاكر خلصت قبلها بشهر ونص والقائمين على الحفلة قرروا إعادتها مرة تانية.

- أكتر هدية نفسى فيها السنة دى إن حد يصلح معايا العربية! هكون مبسوط جدا، وأغلى هدية جات لي كانت من خيرية مراتى وكانت electric عود وبعد شهر العسل فاجئتني بتذاكر سفر لروما فكانت مفاجأة ما تتنسيش.

- بفضل خالد سليم المطرب أكتر، وده لأني كان حلم حياتى إني اقف على مسرح وأغنى وده خلانى نفسى ابقى مطرب اكتر من التمثيل، بس لما شوفت نجاح فيلمي الأول "سنة أولى نصب" فى العرض الخاص قولت لا أنا عايز أكمل وأكرر التجربة.

- لما عملت  دور شرير قبل كده، الشخصية كملت معايا فى البيت وبناتى بقوا يقولولى مالك مكشر ليه؟.

- دور العصبي فى مسلسل "بلا دليل" برضه كمل معايا فى البيت وبيقت عصبى وبزعق وبجز على أسناني لا إراديا!.

- "أغنية "اللى فات مات" ليها معايا قصة إن عزيز الشافعى سمعهالى لما كنت فى فرح واحد قريبي، سديت ودنى وحطيت التليفون على الودن التانية عشان اعرف اسمع  واول ما سمعتها وقعت فى حبها.

- أنا اللي اخترت اسم البوم "this is me“ بالرغم إنه مجرد اسم مفيش أغنية بالاسم ده فى الألبوم بس الأغانى كلها بتعبر عني.

- بحب التخصص جدا، وإني أدي العيش لخبازه حتى لو حاجة أنا بعرف أعملها، لأن كل واحد بيبقى مبدع فى الحتة بتاعته.

- لو هطبق جملة " نجحنا مع بعض و يلا نكمل " مش هطبقها على أى حد غير عزيز الشافعي.

- أكتر حاجة وحشانى من أيام زمان أيام الجامعة هو عم - صبرى بتاع سندوتشات السجق. 

- زوجتي خيرية  بتحب خالد سليم  المطرب أكتر من الممثل واتفاجئت بيا كممثل في التليفزيون لدرجة إنه لما كانت بتخلص  حلقة من مسلسل كانت بتسألني هيحصل إيه بكرة.

- بعتبر نفسي محظوظ إني اشتغلت مع الزعيم عادل إمام و كنت مرعوب فى اول مشهد ليا معاه، وكان فيه قلم فى آخر المشهد و اتعاد ٣ مرات وطلع قلم قلم بس خفيف، وأول ما العمل اتعرض عليا من المخرج رامى إمام مضيت على بياض وقولت كفاية إنى هقف قدام الزعيم عادل إمام.

- الفترة الجاية عندى فيلم هينزل قريبا اسمه "فى القلب" وعندى مسلسلين اسمهم "السجل الأسود" و "بدون مقابل" وكمان عندى مسلسل فى رمضان السنة دى.

- أتمنى أقدم  تجربة مذيع الإذاعة جدا، ولو هعمل برنامج  أحب يبقى فنى و أول ضيف هستضيفه هيكون الموزع الموسيقى فهد والمخرجة كاملة أبو ذكرى.