عمرو أديب: وسام شعيب بتعمل إعلان على جسد المصريات

علق الإعلامي عمرو أديب، على واقعة فيديو طبيبة النساء والتوليد الدكتورة وسام شعيب، بعد خروجها في مقطع فيديو تتحدث فيه عن أسرار بعض المرضى، داعيًا إلى اتخاذ أقصى العقوبات القانونية بحقها.

وهاجم «أديب» خلال برنامجه «الحكاية» عبر شاشة «mbc مصر» طبيبة كفر الدوار، قائلا: «دي مصر ودول ستات مصر، هو إنتي مصرية؟ إزاي دكتورة؟ فين القسم؟ فين النخوة؟ فين الوطنية؟ فين الإسلام؟ فين الستر؟ اوعوا تأخذكم بها أي رحمة، لو محدش ناوي يلاحقها إلى النهاية أنا هلاحقها إلى النهاية، بتعمل إعلان على جسد المصريات».

وتابع: «لو عايز تحط عنوان للفيديو ده ممكن تحط عنوان: مغامرات طبيبة شابة في مجتمع منحل، ده إعلان على جسد المرضى، عشان تبقى مشهورة عشان نعملها لايك وشير، دي لازم تتشطب، هي عار على أطباء وطبيبات مصر العظيمات، عندنا بشوات وهوانم في الطب».

وواصل: «لازم تكون عبرة لمن يعتبر، أي مجتمع في الدنيا فيه حمل سفاح وغيره، ده موجود وبنشوفه، بس دي مش البلد، في ناس بتقتل وتشم كوكاين بس دي مش البلد، دي بلد الناس الشقيانة والتعبانة، واللي بتنزل تشتغل من 6 الصبح لعشرة بالليل».

وأكمل: «اسمعي مجدي يعقوب بيقول إيه؟! عن الشخصيات العالمية اللي بتجليه تتعالج في المستشفى، ولا حد يعرف إيه الحكاية وإيه الموضوع… الناس بقى عندها هوس وجنان بالشويشال ميديا، لازم تبقى عبرة، عشان أي حد يفكر يعمل دعاية على جسد المرضى».

واختتم: «لا تتركوها... مش يومين وتنسوا، لازم تشرب من السم اللي نشرته، لازم تتجرعه قدام المجتمع كله، ربنا مش هيسيبها».