«البوست اتفهم غلط».. أول تعليق من محمد صلاح آدم بعد شكواه من قلة العمل

كشف الفنان محمد صلاح آدم، عن السبب الحقيقي وراء منشوره الخاص بقلة مشاركته الفنية، مما دفعه للتفكير في الانتحار مسبقًا، مشيرا إلى أن الجمهور تفهمه بشكل خاطئ.

أول تعليق من محمد صلاح آدم بعد شكواه من قلة العمل

وقال محمد صلاح آدم، عبر حسابه الشخصي على «فيسبوك»: «والله كم الحب والاهتمام اللي شوفتهم في اليومين اللي فاتوا إذا كان باتصال أو برسالة أو حتى بكومنت حاجة فوق الخيال شكرا من كل قلبي وعلى فكرة هرد على كومنت كومنت في البوست اللي كتبته من يومين».

واستكمل: «بس عايز أوضح حاجة مهمة لأن واضح أن معظم الصحفيين ومعدين البرامج وحتى بعض الأصدقاء فهموا البوست غلط.. أنا مش بشتكي من قلة الشغل اللي هو حقيقي قليل ولكن ده رزق بتاع ربنا.. ده مكانش المقصود من البوست.. أنا كنت برد على كل الناس اللي بيتهموني إني أنا المذنب والمقصر وإني لا أسعى على شغلي من الأقارب والمعارف والأصدقاء وحتى الجيران ومن أتعامل معهم بشكل تقريبا يومي.. حبيت بس أقولهم إني بالعكس أنا بعمل كل اللي عليا وزيادة كمان شوية.. لدرجة إني في وقت من الأوقات من فترة الموضوع أثر عليا وعلى نفسيتي بشكل سلبي وصلتني إني أفكر أفكار صعبة جدا.. ووقتها وقف جنبي مجموعة من الاصدقاء وأولهم كان دكتور أشرف ذكي وأنا مابحبش أقول الكلام ده وبالعكس أنا طول الوقت ببين للناس إني بضحك وكويس وزي الفل».

وتابع: «يعني باختصار متشيلونيش أنا ذنب حاجة أنا ماليش دخل بيها وهذا للتوضيح.. وأنا على العهد والوعد هحارب لأخر يوم في عمري وعمري ماهيأس.. وشكرا كمان مرة لكل الناس العزيزة اللي غرقوني بحبهم اليومين اللي فاتوا».

محمد صلاح آدم يشكو من قلة العمل

يذكر أن الفنان محمد صلاح آدم، أعرب عن استيائه من قلة مشاركته في الأعمال الفنية منذ فترة طويلة، لينضم إلى كل من أحمد عزمي وعفاف مصطفى وحمادة صميدة وياسر فرج.

وكتب محمد صلاح آدم، في منشوره عبر حسابه الرسمي على «فيسبوك»: «طيب بالنسبة للناس الكتير اللي بتقابلني وتقولي انت فين يا فنان انت موهوب قوي وصادق وبنحبك ليه مش بنشوفك في التليفزيون بالسنين وبيجيبوا اللوم عليا اني مش بسعى ومش بكلم المخرجين والمنتجين عوجان مني.. والله العظيم أنا بسعى وبكلم المخرجين والمنتجين ومساعدي الإخراج والمنتجين الفنيين واكاسينج دايريكور ولغاية من يومين بروح أعمل أوديشين اللي هو تيست كاميرا و90 % منهم مش بيردوا أصلا على الموبايل ولا حتى واتساب».

وتابع: «طيب اقولكوا حاجة أقسم بالله أنا كنت هنتحر في وقت كان صعب جدا عليا نفسيا لولا وقوف بعض الأصدقاء جنبي ورجعوني للحياة تاني وأولهم الدكتور أشرف زكي.. أنا ثقتي في ربنا كبيرة ومتأكد إنه الميعاد المناسب اللي هو حايختاره.. وكل مخرج ومنتج ومؤلف وحتى منتج فني سعيتله وكلمته علشان اشتغل معاه ومردش عليا أقسم بالله هو اللي خسران».