بعد وفاة والدها.. أشرف زكي يساند ألفت عمر: عايز أشكرك لأنك أديتي واجبك كبنت بارة

حرص نقيب الممثلين الفنان الكبير أشرف زكي على مساندة الفنانة ألفت عمر بعد رحيل والدها، بعد أول ظهور لها على الشاشة.

وجاء ذلك من خلال مداخلة هاتفية أجراها أشرف زكي مع ألف عمر في برنامجها "مع ألفت"، حيث قال لها:"شيدي حيلك يا حبيبتي كلنا معاكي وزي ما قلتي هو في مكان أحسن بكتير وأنا عايز أقولك إني بشكرك لأنك أديتي واجبك كبنت باره بأبوها وأديتي رسالتك وأنا عارف أنتي عملتي إيه وربنا يصبركوا"

وتابع زكي:" وبشكرك مرة أخرى لأنك جيتي تؤدي عملك وتقابلي جمهورك لأن دا دورنا هو دا الفنان، كانوا بيحكولنا دايما الفنانين الكبار، الفنان محمد رضا بنته توفت وطلع يومها بالليل على المسرح وأستاذ عادل إمام دفن والده وراح المسرح والنهاردة أنتي بعد أيام قليلة جدا جدا بتيجي تؤدي دورك لأن أنتي جندي في الميدان جايه تؤدي دورك اللي أنتي مؤمنة بيه وأكيد هو فرحان بيكي".

يذكر أن ألفت عمر تعرضت لصدمة كبيرة بعد وفاة والدها منذ أيام، بعد صراع مع المرض، حيث كانت حريصة على مشاركة متابعيها لمشاعر قلقها وخوفها على والدها، وطلبت منهم أكثر من مرة الدعاء له، ولكن إرادة الله كانت فوق كل شيء.

وظهرت ألفت عمر في برنامجها مع ألفت الذي يعرض على قناة هي بعد وفاة والدها، وتحدثت عن اللحظات الصعبة التي واجهتها أثناء مرض والدها، وقالت:"مع الأسف هشاركوا غصب عني أحزاني في بابا، بشكر كل الناس اللي دعيت له، كان موقف صعب عليا أوي بس كل الناس وقفت جنبي ودعيت له بس ربنا أراد أنه ياخده معاه جنبه في حته أفضل أعذروني النهاردة لو أنا مكنتش كويسة كفاية قدام الكاميرا بس إن شاء الله هكون أحسن وبابا في مكان أحسن ومسألة الوجع دا إن شاء الله هقدر أعديه بدعواتكوا وحضركوا معايا وإن شاء الله روح بابا حواليا فرحانه، المرة اللي فاتت بعد ما خلصت الحلقة الأولى جريت جري على المستشفى عشان أوريه عشان هو كان بيفرح جدا لما بيشوفني في أي حاجة من نجاحاتي فكنت عايزة أرفع من معنوياته وخدت الصور والفيديوهات وجريت عليه عشان أوريهاله بس لقيته متوفي بقاله 3 دقايق وحتى أنا اللي سبلتله عينه، مش عايزة اضايقكوا خالص والله بس اعذروني لو حصل النهاردة مبقاش قد الحدث".