هند صبري عن رأيها في دخول ابنتيها مجال التمثيل: بحاول أكرههم في الموضوع

كشفت الفنانة هند صبري عن رأيها في دخول ابنتيها مجال التمثيل، خلال لقائها ببرنامج "الراديو بيضحك" عبر إذاعة "الراديو 9090".

وقالت هند صبري: "بنتي الصغيرة بتحب تصميم الأزياء وبتخيط اتعلمت الخياطة وبتخيط لبسها، والكبيرة بحسها ممكن تمثل بس أنا بحاول أكرههم في الموضوع لأنه مش سهل وفيه ظلم لحاجات كتير في شخصيتك وحياتك ومش عايزاهم يعدوا بده، في الآخر دا قرارهم وحياتهم وزي ما أهلي سابوني اختار أنا هحترم أي قرار ليهم لكن أنا مش نفسي يدخلوا المجال دا".

وتابعت هند صبري متحدثه عن ابنتيها: "أن انتي تربي بنات في جيل الإنترنت والسوشيال ميديا صعب جدا، أنا بحاول على قد ما أقدر أوريهم الصورة من وجهة نظري أنا تعليقات سلبية مثلا بوريهالهم عشان يشوفوا عيوب مواقع التواصل الاجتماعي، دلوقتي كل سنة بتعدي أنا بناتي 14 و12، بحس أن الكبيرة بتيجي تحاسبني ليه مروحتيش مهرجان مثلا أنا من الناس اللي بتكسل، تقولي لأ لازم تفوقي لنفسك كله بيلبس فساتين ويتصور وأنتي قاعدة في البيت".

وأكملت هند صبري: "مش عارفة هيبقوا أشطر مننا ولا لأ ساعات بحس أن هما هيبقوا أقوى وساعات بحس أن كل حاجة جاتلهم بسهولة شديدة، إحنا كنا عشان نروح فيلم يا نروح سينما يا نستنى أنه ينزل التليفزيون فبتتعلمي الصبر لكن هما كل حاجة سهله فبشوف أنهم جيل معندوش صبر ودي حاجة قلقاني شوية".

آخر أعمال هند صبري

يذكر أن هند صبري مؤخرا الجزء الثاني من مسلسل "البحث عن علا"، وتدور أحداث الجزء الثاني من "البحث عن علا"، حول "علا" التي تعاني بسبب أن عملها على حافة الانهيار، يقدم هذا الموسم نظرة أعمق على حياتها، حيث تعد كل انتكاسة بمثابة نقطة انطلاق جديدة وتوضع كل علاقاتها على المحك. لكن رغم كل التحديات، يمر قلبها عبر تحولات غير متوقعة حين يدفعها شريك عملها غير المرغوب فيه "كريم" (يؤدي دوره "ظافر العابدين")، لمنح الحب فرصة أخرى.