أيمن نور الدين يكتب : تعرف تبقى سمير صبرى ؟
كتب: بقلم أيمن نور الدين
تعرف تتعلم وتتثقف وتتكلم عدة لغات فى الخمسينات وتبقى بعد كده من رواد الإعلاميين فى مصر والعالم العربى ؟
تعرف تقدم برنامج زى البرنامج الدولى وتستضيف اعظم الشخصيات فى مصر وعالمنا العربى
من قبل مايبقى فيه اصلا برامج مثيله ليه فى العالم العربى ؟
طب تعرف تمثل وتغنى وتبقى استعراضى وتشارك فى بطولة عشرات الأفلام السينمائية العظيمة واللى صعب تتكرر تانى ؟
طب تعرف تعمل برنامج ترفيهى زى برنامج هذا المساء فى النليفزيون المصرى واللى كان حلم كل المشاهير انهم يستضافوا فيه ؟
تعرف كمان تبقى منتج وتقوم بإنتاج عدد كبير من الأعمال الفنية المميزة ؟
تعرف تبقى صديق مخلص لعدد كبير من عمالقة الفن سواء اللى ماتوا واللى لسه على قيد الحياة وتحاول تحل مشاكلهم وتساندهم فى ازماتهم وتسال عنهم حتى بعد ما الأضواء تنحسر عنهم ؟
تعرف تعمل خير كتير أوى فى السر لوجه الله سواء للمعوزين فى الوسط الفنى او خارجه من غير ماتتاجر بيه زى مابيعمل البعض دلوقتى؟.
تعرف تطلع فى مليون برنامج وصحيفة ولا عمرك اسات لحد ولا كشفت اسرار حد ولا خرجت منك العيبة عايش ولا ميت رغم انك الصندوق الاسود للوسط الفنى وكنت تقدر تلم فلوس كتيرة اوى؟.
تعرف تعيش حياة ثرية و حافلة بالعديد من الاحداث والمواقف والنجاحات والإخفاقات والفرح والحزن زى اللى عاشها هو ؟
تعرف تعيش إنسان وتموت إنسان ؟
تعرف تبقى سمير صبرى ؟
صعب أى حد فينا يعرف يعمل اللى عمله سمير صبرى
او يحقق اللى حقفه سمير صبرى
طول عمره متواضع وبسيط ودلوقتى بنشوف فنانين ومذيعين محصلوش ربع موهبته وثقافته وعاملين فيها عظماء
رحم الله سمير صبرى وغفر ذنبه واسكنه فسيح جناته
#سمير_صبرى
#ايمن_نورالدين
