محمد مهران عن الانتقادات التي يتعرض لها: "بسمعها وبأخد منها اللي يفيدني"
كتب: نسرين إبراهيم
تحدث الفنان محمد مهران عن كواليس لأول مرة تخص أعماله الأخيرة، وعن أهم ما يعجبه في مهنة التمثيل.
قال محمد مهران خلال استضافته في بودكاست وفيها إيه على منصة ستوري بالعربي: على الانتقادات التي يتعرض لها أحيانا، قائلًا: «مش دايمًا بتظهر لي الانتقادات قوي ولما بيظهر النقد سواء من شخص مشاهد أو متلقي أو من شخص ناقد ولديه وعي بقرأه سواء على دوري أو على المسلسل بشكل عام وأفلتر كل الكلام وآخد اللي يفيدني سواء حد بيتفرج كتب كومنت أو كتب بوست أو عمل فيديو أو أيا ما يكون بسمعه، لأن عملية النقد عملية مهمة جدًا".
وتابع: "يعني فيه قسم عندنا في معهد الفنون المسرحية اسمه النقد والدراما وإحنا جزء من دراستنا في قسم التمثيل والإخراج ندرس النقد، وسواء جه بالفطرة أو عن دراسة شيء مهم قوي لازم تسمعه وتعرف تنتقي منه الحاجات اللي تفيدك مش تاخده على صدرك زي ما بنقول كده، أي رأي نقدي تقرأه لا تتعالى عليه، وأوقات كتير في اللوكيشن أحب أسأل المخرج أنت شايف حاجة؟ أو الناس اللي بتتفرج شايفين حاجة محتاجة تتعمل بس الرأي الأول للمخرج يعني لأنه صانع العمل، فالنقد ده تحب تسمعه عشان تعدل وتطور من نفسك".
وأضاف: «أحلى حاجة بحبها في المهنة بتاعتنا المذاكرة، شيء ممتع وأوقات تفضل تذاكر تذاكر تذاكر وتلاقي اللي أنت استخدمته من المذاكرة دي نسبة مش كبيرة أوقات ساعات بتحصل، بس رحلة المذاكرة والبحث في العالم ده وإنك تعرف الناس دي بتتكلم إزاي أو الشخصية اللي أنت بتعملها، دي رحلة ممتعة».
وفيما يخص مشاركته في الموسم نفسه بمسلسل المداح الجزء الخامس، علق قائلًا: «التعاون مع حمادة هلال وكل فريق مسلسل المداح جميل، بتحس إنك داخل وسط عيلة».
كما حسم محمد مهران التساؤلات وجدل تعرضه لأي مواقف مرعبة في كواليس مسلسل المداح، وقال: «مسلسل عادي زي أي مسلسل مريت به مفيش أي موقف معايا بشكل شخصي حصل فيه حاجة غريبة أقدر أذكرها، بالعكس حتى كنا بنصور داخل مغارة شبه مهجورة جوه الجبل في قنا في الجزء الثالث، وأنا في العادي مش بخاف من الكلام والحاجات دي عمومًا».
