آسر ياسين: مريت بصعوبات في بداياتي.. وكنت فاكر نفسي هبقى عمر الشريف الجاي

تصدر اسم الفنان آسر ياسين، مواقع التواصل الاجتماعي خلال الساعات الماضية، عقب ظهوره في بودكاست «حوارات مع عباس» الذي يقدمه السيناريست عباس أبو الحسن، حيث تحدث بصراحة عن كواليس انطلاقه في عالم التمثيل والصعوبات التي واجهها في بداياته الفنية.

وأوضح ياسين خلال اللقاء أنه كان يشارك في اختبارات الأداء ويُقبل في بعض الأعمال، لكنه في كثير من الأحيان كان يعتذر بنفسه، موضحًا: «كنت بقول إن عندي Family Business، وأنا في الحقيقة ماعنديش أي حاجة، لكن كنت تايه ما بين شغلي كمهندس متخرج من جامعة أمريكية، وبين اختيارات الحياة الجديدة اللي داخل عليها».

وأشار النجم الشاب إلى أنه في تلك الفترة كان يرى أصدقاءه يبدأون حياتهم المهنية في الخارج أو داخل مصر بثبات، في حين كان هو يخوض مغامرة غير مضمونة في عالم الفن، مضيفًا: «كنت رايح لوكيشن التصوير ومحدش يعرفني، وفاكر نفسي هبقى عمر الشريف الجاي، بس طبعًا اتعلمت بالطريقة الصعبة».

وتحدث ياسين عن كواليس تلك المرحلة قائلاً: «كنت بقعد في أوضة فيها 15 واحد، واللبس بيتوزع علينا بسرعة بمبدأ إلحق إلبس، بس بالرغم من العناء، التجربة دي خلتني أحب الشغل أكتر وأقدّر كل تفصيلة فيه».

كما استعاد الفنان الموقف الطريف الذي كان يعيشه خلال فترات التصوير قائلاً: «كنت بروح لعربية البريك اللي قدام الميكروباص اللي بيطلع الأكل، أسأل فيه إيه؟ يقول جمبري أو فراخ، أقول جمبري، يرد عليّ لأ مفيش غير فراخ.. وآخد الساندوتش وأقعد على جنب».

واختتم آسر ياسين حديثه بتأكيده أنه كان مدركًا لاختياره منذ البداية، قائلاً: «كنت عارف إن الطريق مش سهل، بس أنا اخترت أكمّله، وقررت أستحمل الصعوبات دي برجولة لأنها كانت جزء من الرحلة اللي خلتني أوصل للي أنا فيه دلوقتي».